ئه‌نجومه‌نی وه‌زیرانی هه‌رێمی كوردستان كۆده‌بێته‌وه و جگه له دانوستان له‌گه‌ڵ حكومه‌تی عیراق و ره‌شنوسی پرۆژه‌یاسای بودجه‌ی 2021ی فیدراڵی، روداوه‌كانی چه‌ند رۆژی رابردوش تاووتوێ ده‌كات.
فه‌رمانگه‌ی میدیا و زانیاریی حكومه‌ت بڵاویكردوه‌ته‌وه، پێشنیوه‌ڕۆی ئه‌مڕۆ ئه‌نجومه‌نی وه‌زیران به سه‌رپه‌رشتیی مه‌سرور بارزانی سه‌رۆكی حكومه‌ت و ئاماده‌بوونی قوباد تاڵه‌بانی جێگری سه‌رۆكی حكومه‌ت بۆ تاووتوێكردنی چه‌ند بابه‌تێك كۆده‌بێته‌وه.
به‌گوێره‌ی راگه‌یه‌ندراوێكی فه‌رمانگه‌كه، له كۆبوونه‌وه‌كه‌دا دوا په‌ره‌سه‌ندنه‌كانی دانوستاندن له‌گه‌ڵ حكومه‌تی فیدراڵ سه‌باره‌ت به شایسته داراییه‌كانی هه‌رێمی كوردستان و ره‌شنوسی پرۆژه‌یاسای بودجه‌ی فیدراڵی عیراق بۆ ساڵی 2021 تاووتوێ ده‌كرێت.
هه‌روه‌ها روداوه‌كانی چه‌ند رۆژی رابردوی ناو هه‌رێم و بارگرژی و ناڕه‌زایه‌تییه‌كانی هاووڵاتیان گفتوگۆیان له‌باره‌وه ده‌كرێت.
له ته‌وه‌رێكی دیكه‌شدا ده‌ستپێكردنه‌وه‌ی دامه‌زراندن و تۆماركردنی كۆمپانیای نوێ له بواره‌كانی ته‌ندروستی، ده‌رمان و پێداویستیی پزیشكی، هه‌ڵسه‌نگاندنی بۆ ده‌كرێت.
