فوئاد حسێن وه‌زیرى ده‌ره‌وه‌ى عیراق داوا له بیلاڕوسیا ده‌كات پاره‌كانى عیراق بگه‌ڕێنێته‌وه، چونكه له‌ئێستادا بارودۆخى دارایى خراپه و پێویستى به‌و پارانه‌یه.
وه‌زاره‌تى ده‌ره‌وه‌ى عیراق له‌به‌یاننامه‌یه‌كدا بڵاویكردوه‌ته‌وه، فوئاد حسێن پێشوازى له ڤیكتۆر ریباك باڵیۆزى ده‌ستنیشانكراوى نوێى بیلاڕوسیا له به‌غدا كردوه.
رونیشكراوه‌ته‌وه، وه‌زیری ده‌ره‌وه به باڵیۆزه‌كه‌ی بیلاڕوسیای وتوه “عیراق پاره‌ى لاى وڵاته‌كه‌تانه و پێویسته ئه‌و مه‌له‌فه بجوڵێنرێت، چونكه له‌ئێستادا وڵاته‌كه‌مان به بارودۆخێكى ئابوریى تایبه‌تدا تێده‌په‌ڕێت”.
وه‌زاره‌تى ده‌ره‌وه‌ى عیراق قه‌باره‌ى پاره‌كه‌ی ئاشكرانه‌كردوه و ئاماژه‌ی به‌وه‌نه‌كردوه له كه‌یه‌وه له‌و وڵاته‌یه و چۆن گه‌یشتوه‌ته ئه‌وێ، به‌ڵام پێشتریش و له‌ساڵى 2018دا ئیبراهیم جه‌عفه‌رى وه‌زیرى ده‌ره‌وه‌ى ئه‌وكاته‌ى عیراق داواى هه‌مان پاره‌ى كردبوه‌وه.
