لە چوارچێوەی سەردانەكەیدا بۆ بەغدا، شەوی رابردو شاندی حكومەتی هەرێم لەگەڵ وەزیرانی دارایی و نەوتی عیراق كۆبوەوە و ئەمڕۆش دیدار و كۆبونەوەی دیكە ئەنجامدەدات.
شاندەكەی حكومەتی هەرێم بە سەرۆكایەتی قوباد تاڵەبانی جێگری سەرۆك وەزیران لە بەغدایە و بەگوێرەی راگەیەندراوێكی حكومەتیش، لە كۆبونەوەكەی شەوی رابردوی نێوان هەردوولادا، شاندی هەرێم پابەندبونی خۆی بە ئەركەكانیەوە بەپێی یاسای پڕكردنەوەی كورتهێنانی دارایی عیراق لەبەرابەر دابینكردنی شایستە داراییەكان، دوپاتكردوەتەوە.
بڕیارە ئەمڕۆش شاندەكەی هەرێم زنجیرەیەك كۆبونەوەی دیكە لەگەڵ بەرپرسانی عیراق ئەنجامبدات، بەڵام تائێستا نازانرێت سەركەوتو دەبێت لە ئەركەكەیدا یاخود وەك جارانی پێشو بەبێ ئەنجام دەگەڕێتەوە بۆ هەولێر.
شاندی حكومەتی هەرێم ئێوارەی دوێنێ بەمەبەستی گەیشتن بە رێككەوتن لەگەڵ حكومەتی عیراق گەیشتە شاری بەغدا و بەپرسانی باڵای حكومەتیش لە هەولێر وەك خۆیان دەڵێن ئامادەن بۆ رێككەوتن و ئێستا تۆپەكە لە گۆڕەپانی حكومەتی عیراقدایە، بەڵام بێ متمانەیی گەورەش باڵی بەسەر گفتوگۆكاندا كێشاوە بەوپێیەی پێشتر حكومەتی هەرێم بەوە تۆمەتبار دەكرا، كە پابەندی هیچ رێككەوتنێك نابێت و نەوت و داهاتەكەی و داهاتی دەروازە سنورییەكانیش رادەستی بەغدا ناكات.
