دەستەی سەربەخۆی مافی مرۆڤ داوا دەكات بێ توندوتیژی داواكارییەكان بخرێنەڕو

دەستەی سەربەخۆی مافی مرۆڤ لە هەرێمی كوردستان داوا لەهەموو لایەك دەكات بەبێ توندوتیژی گوزارشت لەداواكارییەكانیان بكەن بۆ چەسپاندنی دادپەروەری و سەروەری یاسا.
دەستەی سەربەخۆی مافی مرۆڤ لەراگەیەندراوێكدا ئاماژەی بەوەكردوە، “دوای ئەوەی لە چەند رۆژی رابردودا لە چەند شارو شارۆچكەیەكی هەرێمی كوردستان لەلایەن چین و توێژەكانی كۆمەڵگاو موچەخۆران و فەرمانبەران خۆپیشاندان بەڕێوەچو، كە داوای موچەكانیان و باشتركردنی ژیانیان دەكرد، سەرەتا خۆپیشاندانەكان بەهێمنانە بەڕێوەدەچو لەچوارچێوەیەكی دیاریكراودا، بەڵام بەداخەوە دواتر ئاڕاستەی خۆپیشاندانەكان گۆڕاو گرژی تێكەوت و كوژراو و برینداربونی ژمارەیەك هاووڵاتی و ئەندامی هێزە ئەمنیەكانی لێ كەوتەوەو چەندان بارەگاو بینای حكومی و شوێنی گشتی-یش سوتێنران”.
دەستەكە جەختدەكاتەوە، خۆپیشاندان وەك مافێكی ئاسایی و یاسایی هاووڵاتیان دەبینن لەپێناو دابینكردنی داواكاریەكان و ئامانجێكی دیاریكراو لە چوارچێوەی یاساو رێنماییەكان و “دور لە توندوتیژی وئاژاوەگێڕی” و دوور لە هەڵكوتانەسەر ماڵ و موڵكی تایبەت و گشتی و لەهەمانكاتدا پاراستنی هاووڵاتیانی خۆپیشاندەر لەلایەن هێزە ئەمنیەكان و پۆلیسی چالاكییە مەدەنییەكان، بۆیە هەمیشە لەو سۆنگەیەوە پاڵپشتی لەهەمو چالاكییەكی مەدەنی و یاسایی دەكەن، كە ئامانج لێی دەستەبەركردنی مافەكانی هاووڵاتیان بێت لەپێناو خۆشگوزەرانی و دابینكردنی موچەو شایستە داراییەكان و چەسپاندنی دادپەروەری و سەروەریی یاسا.
دەستەی سەربەخۆی مافی مرۆڤ داواش لە حكومەتی هەرێمی كوردستان دەكات هەوڵەكانی چڕتربكاتەوە بۆ رێككەوتن لەگەڵ حكومەتی ناوەند لەپێناو دابینكردنی موچەو شایستە داراییەكانی موچەخۆران و رەخساندنی هەلی كارو بنەبڕكردنی گەندەڵی و دابینكردنی ژیانێكی شایستە بۆ هاووڵاتیانی هەرێمی كوردستان و پێویستە حكومەتی ناوەندییش ئەركی دەستوری خۆی جێبەجێبكات لە دابینكردن و ناردنی بەشە بودجە و موچەی هاووڵاتیانی هەرێمی كوردستان وەك بەشێك لە مافی هاووڵاتیان بەپێی دەستوری عیراق”.
هەروەها دەستەی سەربەخۆی مافی مرۆڤ لە هەرێمی كوردستان داوا لە سەرجەم لایەنە سیاسییەكان و دەزگاكانی راگەیاندنیش دەكات بە هەستیاری و هەستكردن بە لێپرسراوێتییەوە مامەڵە لەگەڵ ئەو دۆخەدا بكەن و هەموولایەك هاوكاربن لەپێناو دۆزینەوەی چارەسەری ئەو بارودۆخەو گەیشتن بە رێككەوتن و رێكخستنەوەی ناوماڵی هەرێمی كوردستان و پاراستنی ئاسایشی كۆمەڵایەتی دوور لە خیتابی توندڕەوی و هاندان و لەپێناو زیاتر ئاڵۆزنەكردنی دۆخەكە. راشیگەیاند “لە یەكەم ساتی خۆپیشاندانەكان چاودێری بارودۆخەكەمان كردوەو نوسینگەكان راسپێردراون بۆ بەدواداچون و چاودێریكردنی خۆپیشاندانەكان”.

هەواڵی دواتر

نرخی بەرمیلێک نەوت گەیشتە 111 دۆلار و 43 سەنت

دوێنێ نرخی بەرمیلێک نەوت بۆ 112 دۆلار و 31 سەنت بەرزبووەوە و رۆژەکەی بە 111 دۆلار و 43 سەنت، تەواو …

وەڵامێک بنووسە

پۆستی ئەلکترۆنیکەت بڵاو ناکرێتەوە .