بەمەبەستی داڕشتنەوەی پڕۆگرامەكانی هەماهەنگیی نێوانیان، ژورە بازرگانییەكانی عیراق و هەرێمی كوردستان كۆنگرەی هاوبەشیان لەشاری هەولێر دەستپێكرد.
بەئامادەبونی سەرۆكی 18 ژوری بازرگانیی پارێزگاكانی عیراق و هەرێمی كوردستان، بەیانی ئەمڕۆ كۆنگرە دەستی بە كارەكانی كرد، كە یەك رۆژ دەخایەنێت.
لەكردنەوەی كۆنگرەكەدا، د.محەمەد شوكری سەرۆكی دەستەی وەبەرهێنانی هەرێمی كوردستان وتی “حكومەت دوای دەستبەكاربونی كابینەی نۆیەم گرنگی پێویستی بە كەرتی تایبەت داوە و راسپێردراوین زۆرترین ئاسانكاری بۆ خاوەن كار و بازرگانان بكەین”.
وتیشی “دەرفەتێكی باشی بواری بازرگانی و وەبەرهێنانمان هەیە، جا لە سیاسەتی حكومەتی هەرێمەوە تا كەشوهەوا و ژینگە و سروشتی كوردستان، بۆیە جگەلەوەی چاومان لە وەبەرهێنەرانی بیانییە، زۆرترین كاتیش هەوڵی ئەوەمان داوە وەبەرهێنەرانی عیراقی بێنە هەرێمی كوردستان، ئەوەش دەبێتە هێزی ئابوری بۆ هەرێم و عیراق”.
لەلایەن خۆیشیەوە عەبدولڕەزاق زوهێری سەرۆكی ژوورە بازرگانییەكانی عیراق وێڕای دەربڕینی خۆشحاڵی بە پێشكەوتنی كوردستان لەسەردەستی وەبەرهێنەر و بازرگانان، باسی لەوەشكرد، دەبێت كێشەكانی بازرگانان بەپێی یاسا چارەسەربكرێن تا زۆرترین دەرفەتیان هەبێت بۆ ئاڵوگۆڕی بازرگانی، بۆ ئەو مەبەستەش هەموولایەك ئاسانكارییان بۆ دەكەن.
