سەرچاوەیەك بە رۆژنامەی “الشرق الاوسط”ی لەندەنی وتوە “هەندێك لایەنی سیاسی و حكومی لە بەغدا هیچ بایەخێكیان بۆ چارەسەركردنی كێشەكانی هەرێمی كوردستان نییە و هەوڵیشدەدەن گرفت لەبەردەم چارەسەركردنی ئەو كێشانەدا دروستبكەن”.
بەگوێرەی وتەی سەرچاوەكە، ئەو لایەنانەی بەغدا بایەخ بەو گوشارانە نادەن، كە شەقامی كوردی لە رێی خۆپیشاندانەكانەوە دروستیانكردوە. دەشڵێت “تەنانەت ئەگەر لەم رۆژانەدا چارەسەری بەپەلە بۆ كێشەی شایستە داراییەكانی هەرێم بدۆزرێتەوە، هەر مەترسی تەقینەوەی دۆخەكەی لێچاوەڕواندەكرێت لە هەر ساتێكدا بێت، بە تایبەت لەگەڵ ئەو قەیرانە داراییەی بەغداش پێوەی دەناڵێنێت”.
سەرچاوەكە بە رۆژنامەی “الشرق الاوسط”ی وتوە “بە چەند هۆكارێك و لەنێویشیاندا ئەو بۆشاییەی چەند ساڵێكە كورد لە بەغدا بۆ خۆی دروستیكردوە، هەرێمی كوردستان لەئێستادا هەڵوێستی لە دانوستاندنەكاندا لاوازە، بۆیە دەبینین شاندەكانی دانوستاندن، كە دەچنە بەغدا سازشی زیاتر دەكەن و هیچ دەستكەوتێكیشیان چنگ ناكەوێت”.
هەروەها سەرچاوەكە زانیاری زیاتری ئاشكراكردوە و جەختیكردوەتەوە، هەندێك لە سەركردە سیاسییەكانی شیعە دەیانەوێت قەیرانی نێوان دەسەڵاتدارانی هەرێم و دانیشتوانەكەی زیاتر ببێت بۆئەوەی سازشی زیاتریان دەستبكەوێت.
لە كۆتاییشدا دەڵێت “كاری لەپێشینەی سەركردەكانی كورد بەدەستهێنانی پارەیە بۆ موچەی فەرمانبەران، كاری لەپێشینەی هەندێك لە لایەنە سیاسییەكانیش لە بەغدا پێچەوانەی ئەوەیە، بە تایبەت، كە ئەو لایەنانە بیر لە هەڵبژاردنی داهاتو دەكەنەوە و دەیانەوێت بیبەنەوە”.
