پێشەوا هەورامانی وتەبێژی فراكسیۆنی پارتی لە پەرلەمانی كوردستان رایگەیاند، ئەوەی لەگەڵ بەغدا رودەدات، دانوستاندن نییەو نییەتی ئەوان ملشكاندنی هەرێمە.
ئەو پەرلەمانتارەی پارتی لە نوسینێكدا لەبارەی رێككەوتنی هەرێمی كوردستان و بەغدا نوسیویەتی “لەگەڵ بەغدا ئەوەی رودەدات دانوستاندن نییەو نییەتی ئەوان ملشكاندنە، بەغدا دەیەوێت شتێكی زۆر لە تۆ بسێنێت و كەمێكت پێبدات، شتێك نییە ناوی حكومەتی عیراقی بێت بۆ رێكەوتن لەگەڵی، بەڵكو بڕیارێكی هاوبەشی سیاسی هەیە بۆ گوشینی قوڕگی كورد”.
ئاماژەی بەوەشكردوە، هیچ رێككەوتنێك گەرەنتی نییە لەگەڵ بەغدا، چونكە تائێستا ئەوەی ئەوان دەیانەوێت بچوككردنەوە و لاوازكردن و برسیكردنی هەرێمی كوردستانە.
پێشەوا هەورامانی باس لەوە دەكات كورد یەكدەنگ نییە و ئیستیغلالی ئەو بابەتە كراوە، تەنانەت لەناوخۆوە هەوڵی شكستپێهێنانی رێككەوتنی ئەم چەند رۆژە هەبوە و كەسی بە دەسەڵات هەن دەیانەوێت لەگەڵ بەغدا نەگەینە هیچ.
راشیگەیاندوە، خەڵكێك هەن تەنها بۆ دژایەتی كابینەكەی مەسرور بارزانی ئامادەن هەمو رێگایەك بگرنەبەر، ئەگەر ئەو رێگایە برسیكردنی خەڵكی كوردستانیش ئەنجامەكەی بێت.
