دیندار زێباری رێكخەری راسپاردە نێودەوڵەتییەكان لە حكومەتی هەرێمی كوردستان دەڵێت “پەكەكە بوەتە هۆكارێك بۆ ناسەقامگیری و سەرئێشەیەكی گەورە بۆ دانیشتوانی گوندەكان”.
دیندار زێباری لەبارەی بارودۆخی ئەمدواییەی سلێمانی و روبەڕوبونەوەی پەكەكە و پێشمەرگە، بۆ ئاژانسی ئەنادۆڵ وتویەتی “ناڵێم خۆپیشاندان، چونكە ئەوەی لە سلێمانی رویدا لە پێوەری ئاشتییانە دەرچو، بۆیە مامەڵەی حكومەت لەگەڵ ئەو مەلەفە، كە بریتییە لە سوتاندنی بارەگا و موڵكی گشتی و دروستكردنی مەترسی لەسەر ژیانی هاووڵاتیان، دەبێت مامەڵەیەكی یاسایی بێت و حكومەت بەرپرسیارە سەقامگیری بۆ هاووڵاتیان فەراهەم بكات، حكومەتی هەرێم لەگەڵ مافی خۆپیشاندانە، بەڵام خۆپیشاندان رێوشوێنی تایبەتی خۆی هەیە و ناكرێت خۆپیشاندەر چەكی لەدەستدا بێت و بارەگا بسوتێنێت، ئەمە ناچێتە چوارچێوەی خۆپیشاندانەوە”.
دەشڵێت “بەردەوام لەگەڵ كۆنسوڵ و رێكخراوە بیانییەكان لە پەیوەندیداین و رونكردنەوەكانی حكومەتیش روونە، بەڵام ئەگەر رێكخراوێك گشتاندانێك بكات و یەكلایەنە سەیری دۆخەكە بكات، ئەوا حكومەتی هەرێم مافی خۆیەتی ئەو داتا و زانیارییەی لەبەر دەستییەتی، پێشكەشی بكات”.
دیندار زێباری لەبارەی بونی پەكەكەش وتویەتی “پەكەكە ئەمڕۆ لە بەشێك لە ناوچەی شاخاوی بە قسەی حكومەتی هەرێم ناكات و پەیوەندی لەگەڵ حكومەتدا نییە و حكومەتی هەرێم بەهیچ شێوەیەك لەو جموجوڵەی بەرپرسیار نییە، ئەوان بە سیستەمی خۆیان كاردەكەن، پەكەكە بوەتە هۆكارێك كە ئەم ناوچانە ناسەقامگیربێت و بوەتە سەرئێشەیەكی گەورە بۆ دانیشتوانی گوندەكان و بوەتەهۆكاری ئەوەی سەدان گوندە ئاوەدان نەبێت و خەڵك نەتوانێت بگەڕێتەوە سەر زێدی خۆیان لە ماوەی 20 ساڵی رابردودا”.
