wazho.net
سالار مەحمود راوێژكاری پێشوی سەرۆك كۆماری عیراق، جەختدەكاتەوە لە سەردەمی مستەفا كازمی سەرۆك وەزیراندا، دۆخی ئابوریی وڵات خراپتر بوە.
سالار مەحمود، كە پێشتریش پەرلەمانتاری كوردستان بو، لە پەیجی خۆیەوە لە فەیسبوك رەخنەی لە كارەكانی مستەفا كازمی سەرۆك وەزیرانی عیراق گرتوە و ئەوەی وەبیرهێناوەتەوە، كە تەنها ئەركی كابینەكەی، ئامادەكارییە بۆ هەڵبژاردنی پێشوەخت، بەڵام لە ماوەی شەش مانگی حوكمڕانی كازمی-دا 54 چالاكوانی مەدەنی و خۆپیشاندەر كوژراون.
دەشڵێت “دۆخی ئابوریی عیراق لە سەردەمی مستەفا كازمی-دا خراپتر بوە، دۆخی سیاسی شێواوتر بوە، رەوشی خزمەتگوزاری كەمتربوە و دابەزیوە، موچەی فەرمانبەرانی عیراق بە یاسای قەرزیشەوە دواكەوتوە، دەستوەردانی دەرەكی زیادی نەكردبێت كەمی نەكردوە”.
هەروەها راوێژكارەكەی پێشوی بەرهەم ساڵح دوپاتیكردوەتەوە، لە سەردەمی كابینەكەی مستەفا كازمی دا، گرتوخانەی نهێنیی میلیشیاكان زۆرتر بوە، زۆرترین خۆدەرخستن و كەمترین ئەركی بەجێهێناوە، چەكیش هەر لە دەستی لە یاسا دەرچواندایە.
لە بەشێكی دیكەی رەخنەكانیدا، سالار مەحمود پێداگری دەكات لەوەی لە سەردەمی كابینەی ئێستای حكومەتی عیراقدا، گەندەڵی زیادی كردوە و كەمی نەكردوە، یاریكردن بەنرخی دراوی عیراقی-یش جۆرێكی نوێیە لە داهێنانی گەندەڵی، دراوەكە كەم نرختریش بوە.
لەبارەی كارەكانی مستەفا كازمی لە دژی هەرێمی كوردستانیش، راوێژكاری پێشوی سەرۆك كۆماری عیراق نوسیویەتی “لەسەردەمی كازمی –دا شایستە داراییەكانی كوردستان كەمی كرد و وا بڕدرا. حەشدی كوردی وەك هێزی نیزامی لە كەركوك دروستكرا، كە خودی خۆی فەرماندەی هێزە چەكدارەكانی عیراقە”.
هەروەها لە كۆتاییشدا باس لەوە دەكات، هەرچەندە مستەفا كازمی لەناو بازنەی دەوڵەتی قوڵی شیعەدا نییە و هێزی چەكدار و كوتلەی پەرلەمانی نییە، راستە زۆربەی قەیرانەكان هی سەردەمی ئەو نین و كەڵەكەبوی رابردون، بەڵام دەرئەنجام، بەڵێن و فوكردنە خۆیەكانی، رەوایی دەدەن بەوەی بوترێت “كازمی نمایشكارێكی وەك شیر هەڵچوو بوو، هەربۆیە زوو نیشتەوە”.
