بەپێی ئامارەكانی رێكخراوێكی هەرێمی كوردستان، زۆربەی ئەو كرێكارە مێینانەی لە كەرتی تایبەتدا كاردەكەن، گێچەڵیان پێدەكرێت، بۆیە بیر لە گۆڕینی كارەكانیان و چونە كەرتی حكومی دەكەنەوە، زۆربەشیان دەستەبەری كۆمەڵایەتییان بۆ نەكراوە.
ئەمڕۆ شەممە لە شاری هەولێر كۆنفرانسی رەوشی كرێكارانی مێینە لە هەرێمی كوردستان بەڕێوەچوو، روپێوییەك خرایەڕوو، كە لەلایەن ڕێكخراوی ئاشتی و ئازادی ئامادەكرابوو، تیایدا هاتووە، 20%ی كرێكارانی كەرتی تایبەت ئافرەتن، لەو ڕێژەیە 80%یان توشی گێچەڵ و دەستدرێژیی سێكسی و هەڕەشە بوونەتەوە، تەنها 10%یان سكاڵایان تۆماركردووە و لەو رێژەیەش، تەنها 10%یان سكاڵاكەیان بۆ یەكلایی بۆتەوە، 20%یشیان بەهۆی كارەكانیانەوە توشی كێشەی خێزانی بوونەتەوە.
هەر بەپێی روپێوییەكە، 78%ی كرێكاری مێینە لە هەرێم دەستەبەری كۆمەڵایەتیان بۆ نەكراوە، 69%یان ئامادەن واز لە كارەكانیان بێهینن و لە كەرتی تایبەتەوە رووبكەنە كەرتی حكومی، 57%ی كرێكاری مێینە گرێبەستی كاركردنیان نییە و 48%یش هیچ زانیارییەكیان لەسەر یاسای كار و دەستەبەری كۆمەڵایەتی نییە.
لای خۆیەوە عارف حیتۆ بەڕێوەبەری گشتیی كار و دەستەبەری كۆمەڵایەتی لە كۆنفرانسەكەدا، لەبارەی بەشداریی ئافرەتان لە دەستەبەری كۆمەڵایەتی ئاشكرایكرد، لە هەرێمی كوردستان 83 هەزار كرێكار دەستەبەر كراون، تەنها هەزار و 500یان ئافرەتن، هەروەها لە ساڵی 2019 ، 5 هەزار و 765 كرێكار لە كوردستان لە كارەكانیان دابڕاون، كە 852یان ئافرەتن.
بەڕێوەبەری گشتیی كار و دەستەبەری كۆمەڵایەتی راشیگەیاند، لە ئێستادا 83 هەزار و 977 كرێكار لە 28 هەزار و 780 پڕۆژەدا كاردەكەن، كە 77 هەزار و 17یان كرێكاری خۆماڵین و لەو ژمارەیە 9 هەزار و 939یان مێینەن، لە بەرانبەریشدا 6 هەزار و 960 كرێكاری بیانی هەن، كە هەزار و 550یان مێینەن.
