به‌پێی ئاماره‌كانی هێزه‌كانی پاراستنی گه‌ل – هه‌په‌گه، له‌مساڵدا نزیكه‌ی 950 سه‌ربازی توركیا كوژراون و 227 گه‌ریلاش شه‌هید بوون، هه‌روه‌ها له‌ساڵی 2017وه تا ئێستا 173 هاوڵاتی له باشوری كوردستان به‌هۆی هێرشه‌كانی سوپای توركیاوه شه‌هید بوون.
ناوه‌ندی راگه‌یاندن و چاپه‌مه‌نی هێزه‌كانی پاراستنی گه‌ل –هه‌په‌گه، كه باڵی سه‌ربازیی په‌كه‌كه‌یه، ئاماری چالاكییه‌كانی خۆی و ئۆپه‌راسیۆنه ئاسمانی و وشكانییه‌كانی سوپای توركیای له باكور و باشوری كوردستان بڵاوكرده‌وه، ئاشكرایكردووه، ئه‌مساڵ 946 سه‌ربازی سوپای توركیایان كوشتووه، له به‌رانبه‌ردا 227 گه‌ریلا شه‌هید بوون، هه‌روه‌ها به‌هۆی هێرشه‌كانی سوپای توركیا بۆسه‌ر باشوری كوردستان، دوو فه‌رمانده‌ی سه‌ربازیی سوپای عێراق و 24 هاوڵاتیی هه‌رێمی كوردستان شه‌هید بوون، كه له‌نێویاندا چوار منداڵ و دوو ژن هه‌ن.
هه‌په‌گه دوپاتیكردووه‌ته‌وه، له ساڵی 2017ـه‌وه تا ئێستا، 173 هاوڵاتیی باشوری كوردستان به‌هۆی هێرشه‌كانی توركیاوه شه‌هید بوون.
هه‌ر به‌پێی ئاماره‌كانی هه‌په‌گه، له‌مساڵه‌دا 393 چالاكیی سه‌ربازییان له باكور و باشوری كوردستان ئه‌نجامداوه، سوپای توركیاش هه‌زار و 275 ئۆپه‌راسیۆنی ئاسمانی و 120 هێرشی زه‌مینیی ئه‌نجامداوه.
