پەرلەمانتارێكی یەكێتی رەخنە لە بوونی ئەو هێزە سەربازییانە دەگرێت، كە خەڵكی باشوری كوردستان نین، بەڵام لەلایەن پارتی دیموكراتی كوردستانەوە دروستكراون و لەلایەن یەكەی 80ی پارتییەوە كۆمەك دەكرێن، بە یەكێك لە هۆكارەكانی یەكنەگرتنەوەی هێزی پێشمەرگەی دەزانێت.
عوسمان سێدەری پەرلەمانتاری فراكسیۆنی یەكێتی لە پەرلەمانی كوردستان، كە هاوكات جێگری سەرۆكی لیژنەی پێشمەرگەیە، لە لێدوانێكیدا بۆ ئاژانسی هەواڵی رۆژ نیوز، رایگەیاندووە، لەماوەی شەڕی داعشدا، بەنایاسایی چەند هێزێكی سەربازی دروستبوون، “كە لەلایەن هێزەكانی زێرەڤانی و یەكەی 80ی پارتییەوە كۆمەك كراون”، كە سێدەری پێی وایە “دروستبوونی ئەو هێزانە پێویست نەبوون و بونەتە بارگرانی بەسەر وەزارەتی پێشمەرگەوە و زیانیان بە یەكگرتنەوەی هێزی پێشمەرگە گەیاندووە”.
پەرلەمانتارەكەی یەكێتی داوا دەكات، “وەزارەتی پێشمەرگە لەجیاتی ئەوەی خەڵكی دەرەوەی باشوری كوردستان بكاتە پێشمەرگە، پێویست بوو ئەو هەزاران گەنجەی لەباشور بێكارن، بیانكاتە پێشمەرگە”.
لەبارەی جوڵاندنی هێزی پێشمەرگەشەوە بۆ ناوچە سنورییەكان، عوسمان سێدەری دەڵێت، “جوڵاندنی هێزی پێشمەرگە بە فەرمانی وەزیری پێشمەرگە دەبێت، ئەمەش بەپێی پێویستی و بوونی پشێوی لەو شوێنانەی كە هێزیان بۆ ئاراستە دەكرێت”، راشیگەیاندووە، “جوڵاندنی هێزی پێشمەرگە بەشێكی پەیوەندیی بە جموجۆڵەكانی داعشەوە هەیە، بە تایبەت لەناوچە دابڕێنراوەكان، هاوكات لەناوچە سنوریەكانیش پەیوەندی بە داگیركاریی ئێران و توركیاوە هەیە”، بۆیە ئەوان لە لیژنەی پێشمەرگەی پەرلەمانی كوردستان پێشنیازیان كردووە، هاوشانی پاسەوانی سنوری عیراق، هێزی پێشمەرگەش بچێتە ناوچە سنوریەكان.
لە چەند ساڵی رابردوو و لەمیانی شەڕی دژ بە داعش، پارتی دیموكراتی كوردستان هێزێكی بۆ كوردانی رۆژئاوای كوردستان دروستكرد، بەناوی “هێزی پێشمەرگەی رۆژ” و لەلایەن خودی پارتی دیموكراتی كوردستانەوە كۆمەك و هاوكاری دەكرێن و موچەیان دەدرێتێ، كە ژمارەیان نزیكەی 5 هەزار بۆ 8 هەزار چەكدار دەبێت و لەماوەی رابردوودا بەشێك لەو هێزە برانە ئەو ناوچانەی گەریلاكانی پەكەكەی لێیە، چەند جارێكیش گرژی لەنێوانیاندا دروستبووە و جوڵاندنی ئەو هێزە نیگەرانیی پەكەكەی لێكەوتوەتەوە.
