دۆناڵد ترامپ سەرۆكی ئەمریكا رایگەیاند، لەوانەیە چین لە پشت ئەو هێرشە ئەلیكترۆنییانەوە بێت، كە دەكرێنەسەر زۆربەی دامەزراوەكانی ئەمریكا.
ترامپ لە هەژماری تایبەتی خۆی لە تویتەر رایگەیاند، لەبارەی ئەو هێرشە ئەلیكترۆنییانەی كراونەتەسەر ژمارەیەك دامەزراوەی وڵاتەكەی، زانیاری پێدراوە. دەشڵێت “هێرشی ئەلیكترۆنی لە راستیدا زۆر گەورەترە لەوەی لە میدیای ساختەدا بڵاودەكرێتەوە”.
سەرۆكی ئەمریكا ئاماژەی بەوەشداوە، هەموو شتێك لەژێر كۆنترۆڵدایە و وتی “روسیا، روسیا، روسیا هەر كە شتێك روودەدات ئەوەی زۆر دەگوترێتەوە ئەمەیە، چونكە میدیای گشتی زۆربەیان بەهۆكاری دارایی، (لەوانەیە) بترسێت لە تاووتوێكردنی ئەگەری بوونی چین (لە پشت هێرشە ئەلیكترۆنییەكان”.
تویتەكەی سەرۆكی ئەمریكا وا هەڵسەنگاندنی بۆ كرا، كە پێچەوانەی لێدوانەكانی بەرپرسە باڵاكانی كابینەكەی خۆیەتی لەبارەی هێرشی ئەلیكترۆنییەوە.
