حزبی دەعوەی عیراقی، كە نوری مالكی سەركردایەتیی دەكات، رەخنە لە بڕیاری دابەزاندنی نرخی دیناری عیراقی بەرانبەر بە دۆلاری ئەمریكی دەگرێت، پێی وایە فەرمانبەران زیان دەكەن و كێشەی داراییش چارەسەر ناكات.
دوای ئەوەی بانكی ناوەندی عیراقی بڕیاری دا نرخی دینار بەرانبەر بە دۆلار دابەزێنێت، مەكتەبی سیاسیی حزبی دەعوەی عیراقی راگەیەندراوێكی بڵاوكردەوە، دەڵێت، بڕیارەكە رەنگدانەوەی خراپی لەسەر فەرمانبەران و هەژارانی عیراق دەبێت و ئەو سیاسەتە وڵات ناگەیەنێتە كەناری ئارامی، هەروەها چارەسەری كێشەی قوڵی داراییش ناكات، بەڵكو لە هەموو روویەكەوە كێشەی زیاتر دروست دەكات.
بۆیە حزبی دەعوە بە پێویستی دەزانێت، حكومەت بەدوای جێگرەوەی كاریگەرتردا بگەڕێت، كە زیانی كەمتر بێت بۆ چارەسەركردنی كەمیی داهات و كەمكردنەوەی كورتهێنانی بودجە، هەنگاوەكەش بە نەزۆك وەسفدەكات و دەڵێت “لە چارەسەری كێشەكان نزیكمان ناكاتەوە”.
لە كۆتاییدا مەكتەبی سیاسیی حیزبی دەعوە داوا لە حكومەت و هێزە سیاسییەكان دەكات دەرچەیەك بۆ قەیرانی ئابوری بدۆزنەوە، كە لەگەڵ دۆخی عێراق و گەلەكەیدا بگونجێت.
حزبی دەعوەی عیراقی یەكێكە لە حزبە سەرەكییە شیعییەكانی عیراق، لە دوای ساڵی 2003 چەند جارێك پۆستی سەرۆك وەزیرانی وەرگرتووە.
