كۆمسیۆنی باڵای سەربەخۆی هەڵبژاردنەكانی عیراق ئاشكرایكرد، مۆڵەتی دامەزراندنی 231 حزبی سیاسی دراوە و 427 حزبیش خۆیان تۆماركردوە بۆ بەشداریكردن لە هەڵبژاردنەكاندا.
جەمانە غلای وتەبێژی كۆمسیۆنی باڵای سەربەخۆی هەڵبژاردنەكان لەلێدوانێكی رۆژنامەوانیدا باسی لەوەكرد، ژمارەی ئەو حزبە سیاسیانەی ناویان تۆماركردوە بۆ بەشداریكردن لە هەڵبژاردنەكاندا گەیشتوەتە 427 حزب.
رونیشكردوەتەوە، مۆڵەتی دامەزراندن بە 231 حزبی سیاسی دراوە و ژمارەی داواكاریەكانی تۆماركردنی ئەو حزبانەشی لە پرۆسەی دامەزراندندان گەیشتوەتە 80 داواكاری.
وتەبێژەكەی كۆمسیۆن ئەوەشی ئاشكراكردوە، داواكاری تۆماركردنی 99 حزب رەتكراوەتەوە، هۆكارەكانیش جیاوازن، لەوانە تەواونەكردنی رێوشوێنە پێویستەكان یاخود دواكەوتن لە ماوەی تۆماركردن، سەرەڕای ئەوەش 17 حزبی سیاسی داواكاریەكانیان بۆ تۆماركردن كشاندوەتەوە.
