ئەندامێكی كوردی لیژنەی دارایی پەرلەمانی عێراق دوپاتیدەكاتەوە، پەرلەمان ناتوانێت دەستوەردان لە بڕیاری وەزارەتی دارایی و بانكی ناوەندی بكات لەبارەی نزمكردنەوەی بەهای دینار بەرانبەر بە دۆلار، بەڵام دەتوانێت لێپرسینەوە بكات.
هۆشیار عەبدوڵا پەرلەمانتاری گۆڕان و ئەندامی لیژنەی دارایی پەرلەمانی عێراق، لە نوسینێكدا بڵاویكردوەتەوە، “ئەمڕۆ بە نوسراوێكی فەرمی، بانكی ناوەندی نرخە نوێكانی دیناری عێراقی بەرامبەر دۆلاری ئەمریكی بە واژۆی پارێزگاری بانكەكە راگەیاندراوە، ئەو بەرزكردنەوەیە بۆ یەكجارە، واتا بانكی ناوەندی سیاسەتی نوێی ئەوەیە لە نیوان 145 هەزار بۆ 147 هەزار ئەو نرخە دیاری بكات و بەهای دینار بپارێزێت”.
هۆشیار عەبدوڵا قسەشی لەبارەی هەڵوێستی پەرلەمانی عێراقەوە كردووە، نوسیویەتی، “دەستكاریی بەهای دراو تایبەتمەندیی وەزارەتی دارایی و بانكی ناوەندیە، بەشێكە لە سیاسەتی نەختینەیی، كە پەرلەمان ناتوانێت تەداخولی تێدا بكات، بەڵام دەتوانێت وەزیر و پارێزگاری بانكیش باگهێشت و لێپرسینەوە وئیقالە بكات”.
لە كۆتاییدا پەرلەمانتارەكەی گۆڕان دەڵێت، دەیانەوێت نرخی دینار لەم نرخە نوێیە راگرن و “لەگەڵیدا كۆمەڵێك رێوشوێنی تر بگرنە بەر، هەموو ئەوانەش لەپێناوی ئەوەدایە ئابوریی عێراق و دینارەكەی توشی داڕوخان نەبێت و یەدەگی عێراق بپارێزن”.
