wazho.net
دادگای توركیا ژنە پەرلەمانتارێكی پێشوی كوردی سەربە هەدەپەی بە زیاتر لە 22 ساڵ زیندانی سزادا و هەدەپەش ئەو سزایە رەتدەكاتەوە.
دادگای توركیا بە تۆمەتی بونی پەیوەندی لەگەڵا پەكەكە و بڵاوكردنەوەی پڕوپاگەندە بۆ ئەو پارتە، سزای 22 ساڵ و 6 مانگ زیندانی بۆ لەیلا گوڤەن پەرلەمانتاری پێشوی هەدەپە دەركرد.
لەوبارەیەوە دەستەی ناوەندی بەڕێوەبەرایەتی هەدەپە لە راگەیەندراوێكدا بڵاویكردوەتەوە، لەیلا گوڤەن هاوسەرۆكی كەجەدە و پەرلەمانتاری پێشوی هەدەپە، كە ساڵی رابردو پەرلەمانتاریەكەی بەشێوەیەكی ناڕەوا لێسەندرایەوە، ئێستاش لە ئەنجامی یاسایەكی دوژمنكارانەدا 22 ساڵ و 6 مانگ سزای زیندانی بەسەردا سەپێنراوە.
هەدەپە جەختدەكاتەوە، دادگا بەو بڕیارە ئەوەی خستەڕو، كە بەپێی بەرژەوەندیەكانی دەسەڵات دەجوڵێتەوە، ئەو بڕیارەش دوژمنكارانەیە و تەنها لە دژی لەیلا گوڤەن و كەجەدە نەبوە، بەڵكو لە دژی گشت گەلی كورد و لایەنە ئۆپۆزسیۆنەكان بو.
هەر لەبەیاننامەكەدا باسلەوەكراوە، بە زیندانیكردن و سزادان، نە لەیلا گوڤەن و نە هەدەپە واز لە تێكۆشان ناهێنن، وەكو هەدەپەش ئەو سزا نایەكسان و دوژمنكارانەیە ناناسن و رەتیدەكەنەوە.
