بەپێی داتا نوێیەكانی حكومەتی ئەمریكا، لەماوەی هەفتەیەكدا هەر 33 چركە جارێك، ئەمریكییەك بەهۆی ڤایرۆسی كۆرۆناوە گیانیلەدەستداوە.
سەرچاوەكانی هەواڵی ئەمریكا ئەوەیان بڵاوكردوەتەوە، لەماوەی هەفتەیەكدا لە 13 بۆ 20ی ئەم مانگە، 18 هەزار ئەمریكی بەهۆی ڤایرۆسی كۆرۆناوە گیانیانلەدەستداوە.
رونیشكراوەتەوە، لەو ماوەیەدا ژمارەی گیانلەدەستدان 6.7% بەراورد بە هەفتەی پێشوتر زیادیكردوە و ئەوەش ژمارەیەكی پێوانەیی بوە، سەرەڕای ئەوەی بەرپرسان داوا لە هاووڵاتیان دەكەن لە پشوەكانی كۆتایی ساڵدا گەشت نەكەن، بەڵام تەنها رۆژانی هەینی و شەممەی رابردو 3 ملیۆن و 200 هەزار پاسپۆرت لە فڕۆكەخانەكانی ئەو وڵاتە پشكنینیان بۆ كراوە.
ئەمریكا زەرەرمەندترین وڵاتی جیهانە بەهۆی ڤایرۆسی كۆرۆناوە و زیاتر لە 18 ملیۆن توشبوی تۆماركردوە، تائێستاش زیاتر لە 326 هەزار كەس گیانیانلەدەستداوە، بەرپرسانی تەندروستیش ترسی ئەوەیان هەیە لەكاتی پشوەكانی سەری ساڵدا، بڵاوبونەوەی ڤایرۆسەكە زیاتر تەشەنەبسەنێت.
