رەجەب تەیب ئەردۆغان رەتیدەكاتەوە لەسەر قسەی دادگای مافەكانی مرۆڤی ئەوروپا، سەڵاحەدین دەمیرتاش ئازاد بكەن.
دوای ئەوەی دادگای مافەكانی مرۆڤی ئەوروپا داوای لە دەسەڵاتدارانی توركیا كرد، دەستبەجێ سەڵاحەدین دەمیرتاش هاوسەرۆكی پێشووتری هەدەپە ئازاد بكەن و پرسەكەیان بەستەوە بە دیموكراسییەتەوە، بەڵام رۆژنامەی حوڕییەت-ی توركیا ئاشكرایكردووە، رەجەب تەیب ئەردۆغان سەرۆك كۆماری توركیا، لەكاتی كۆبونەوەی دەستەی سەرۆكایەتیی ئاكپارتی-دا رایگەیاندووە، ئەنقەرە پابەندی بڕیاری دادگای مافەكانی مرۆڤی ئەوروپا نابێت بۆ ئازادكردنی دەمیرتاش، بەو پێیەی هێشتا پڕۆسەی دادگاییكردنی ناوبراو لە ناوخۆی توركیا تەواو نەبووە.
رۆژنامەكە ئاشكراشی كردووە، دەستەی سەرۆكایەتیی ئاكپارتی بڕیاریداوە لێكۆڵینەوە لە داواكاری و بڕیارەكەی دادگای مافەكانی مرۆڤی ئەوروپا بكات بۆ ئازادكردنی دەمیرتاش.
دوێنێ دادگای مافەكانی مرۆڤی ئەوروپا داوای لە توركیا كرد دەستبەجێ سەڵاحەدین دەمیرتاش ئازادبكەن، دادگاكە دوپاتیكردوەتەوە، ئازادكردنی دەمیرتاش پەیوەست بە دیموكراسییەوە پرسێكی زۆر گرنگە و هیچ چەندوچوونێك هەڵناگرێت، پێشی وایە، هێشتنەوەی دەمیرتاش بۆ ماوەی چەند ساڵێك لە زیندان، هەوڵێكی دەسەڵاتدارانی توركیایە بۆ رێگریكردن لە فرەیی و گفتوگۆی سیاسی.
