دۆناڵد ترامپ سەرۆكی ماوە كۆتایی هاتوی ئەمریكا لێخۆشبونی بۆ 4 پاسەوانی كۆمپانیای (بلاك وۆتەر) دەركرد، كە بە كوشتنی 14 هاووڵاتی مەدەنی لە عیراق سزای زیندانییان بۆ دەركرابو.
رۆژنامەی “گاردیان”ی بەریتانی بڵاویكردوەتەوە، ئەو چوار پاسەوانە، كە ناویان “پۆڵ سلاو، ئیڤان لیبەرتی، داستن هێرد و نیكۆلاس سلاتن”ە، بەشێك بوون لە كاروانێك و بەشێوەیەكی هەڕەمەكی دەستڕێژی گوللـەیان كردوە، كە بە كوشتارگەی “مەیدانی نسور” بەناوبانگە.
رونیشكراوەتەوە، تۆمەتبارەكان سزای زیندانی “هەمیشەیی، 30 ساڵ، 17 ساڵ و 13 ساڵ”یان بەسەرداسەپێندرابو، بەڵام دۆناڵد ترامپ بڕیاری لێخۆشبونی بۆ دەركردون و ئازادكراون.
ئەوە یەكەم كاری ترامپ نییە و پێشتریش بڕیاری لێخۆشبونی بۆ ئەو ئەفسەر و سەربازانە دەركردوە، كە تۆمەتباربون بە كوشتنی هاووڵاتیانی مەدەنی لە عیراق و ئەفغانستان و چەندین وڵاتی تر.
كوشتارگەی “مەیدانی نسور” لەساڵی 2007 لەشاری بەغدا رویداوە و سەرەڕای كوژراوەكان 20 كەسی تریش برینداربون و ئەو 4 تۆمەتبارەش لەساڵی 2014دا سزاكەیان بەسەرداسەپێنرا.
