دوای هەڕەشەكانی گروپەكەی سەربە عەسائیبی ئەهلی حەق، لیژنەی ئاسایش و بەرگریی پەرلەمانی عێراق پشتگیریی داواكارییەكەی موقتەدا سەدر دەكات بۆ راگەیاندنی باری لەناكاو لە بەغدای پایتەخت و هاتنەناوەوەی سوپا بۆ كۆنترۆڵكردنی دۆخی ئەمنیی شارەكە.
دوای هێرشی موشەكیی چەند شەوی رابردووی گروپە چەكدارەكان بۆسەر ناوچەی سەوز و باڵیۆزخانەی ئەمریكا، موقتەدا سەدر رێبەری رەوتی سەدر دۆخی عیراق و بەتایبەت بەغدای پایتەختی بە مەترسیدار وەسفكرد، داوایكرد باری لەناكاو لە بەغدا رابگەیەندرێت و سوپا كار بۆ كۆنترۆڵكردنی دۆخی شارەكە بكات.
دوای ئەوەی شەوی رابردووش گروپێكی چەكدار، كە لەپەیامێكی ڤیدیۆییدا خۆی بە عەسائیبی ئەهلی حەق ناساند، رایگەیاند، هێزەكانیان لەناو بەغدا بڵاوبونەتەوە و چاوەڕوانی ئاماژەیەكی قەیس خەزعەلی سەركردەی عەسائیبی ئەهلی حەقن بۆ هێرشكردنە سەر “بەكرێگیراوەكانی ئەمریكا”، محەمەد حەیدەری سەرۆكی لیژنەی ئاسایش و بەرگریی پەرلەمانی عێراق لەراگەیەنراوێكدا دەڵێت، لیژنەكەیان لەگەڵ داواكارییەكەی موقتەدا سەدر رێبەری رەوتی سەدرە بۆ راگەیاندنی باری لەناكاو لەبەغدا.
سەرۆكی لیژنەی ئاسایش رایگەیاندووە، “بەغدای پایتەخت پێویستی بە سوپا هەیە بۆ كۆنترۆڵكردنی ئەو ناوچانەی كراوەن و لەرێگەیانەوە هێرشدەكرێتە سەر باڵیۆزخانەكان”، نەشیشاردوەتەوە، كە “لەئێستادا هەڵمەتی كوشتنی چالاكوانان، زیادەڕۆییكردنە سەر موڵكی گشتی، رێزنەگرتنی خەڵك و پۆلیسی هاتوچۆ لەلایەن هەندێك لایەنەوە بەردەوامیی هەیە”، بۆیە دوپاتیدەكاتەوە، “پێویستە لە بەغدا ئاسایش دابینبكرێت و یاسا بەسەر هەمواندا جێبەجێ بكرێت”.
