ئەو سەركردە و ئەندامانی عەسائیب ئەهلی حەق، كە دەستگیركراون، لەلایەن لیژنەیەكەوە، كە نوێنەری حەشدی شەعبیشی تێدایە، لێكۆڵینەوەیان لەگەڵدا دەكرێت، هەریەك لە ئایەتوڵڵا عەلی سیستانی و ئیسماعیل قائانی فەرماندەی فەیلەقی قودس-یش پشتگیری هەوڵەكانی مستەفا كازمی دەكەن بۆ بەرەنگاربوونەوەی ئەو گروپانەی ئاسایشی عیراق دەخەنە مەترسییەوە.
لە راپۆرتێكیدا رۆژنامەی “عەرەبی جدید” ئاشكرایكردوە، لیژنەیەك پێكهێنراوە بۆ لێپرسینەوە لە دەستگیركراوەكانی عەسائیب ئەهلی حەق، كە جگە لە نوێنەری هێزە ئەمنی و هەواڵگرییەكان، نوێنەری حەشدی شەعبیشی تێدایە، ئەو هەنگاوەش بوەتەهۆی هێوركردنەوەی دۆخەكە.
سەرچاوەیەكی حەشدی شەعبی بە رۆژنامەكەی راگەیاندوە، هەنگاوی دەستگیركردنی ئەو سەركردە و ئەندامانەی عەسائیب، بە پشتگیری و ئاگاداریی ئیسماعیل قائانی فەرماندەی فەیلەقی قودسی سوپای پاسدارانی ئێران بوە و بۆ ئەوەیە، رێگە لەو گروپانە بگیرێت، كە لادەر و ناپابەندن، جگەلەوەی “ئەبو فەدەك” سەرۆكی ئەركانی حەشدی شەعبی و هادی عامری سەركردەی هاوپەیمانێتیی فەتح ئاگاداری ئەو هەنگاوەن.
بەرپرسێكی باڵای عیراقیش، بێ ئەوەی ناوی بهێنرێت، بە رۆژنامەكەی وتوە، مستەفا كازمی سەرۆك وەزیرانی عیراق پشتگیریی عەلی سیستانی مەرجەعی باڵای شیعەكانی بەدەستهێناوە لە پرسی بەرەنگاربونەوەی ئەو گروپانەی ئاسایشی عیراق دەخەنە مەترسییەوە.
لەوبارەیەشەوە سیستانی دوپاتیكردووەتەوە، نابێت هیچ كەس و لایەنێك لە سەرووی دەوڵەت و یاسا و حكومەتەوە بێت، بۆیە پشتگیریی تەواوی هەنگاوەكانی حكومەتەكەی مستەفا كازمی دەكات بۆئەوەی نەهێڵێت عیراق ببێتە مەیدانی بەرەنگاربونەوەی بەوەكالەت.
