درەنگانی شەوی رابردوو فەرمانی دەستگیركردن بۆ ئەو سەركردەیەی عەسائیب دەرچوو، كە هەڕەشەی گوێبڕینی لە مستەفا كازمی كردبوو.
دادگای لێكۆڵینەوەی كەرخ-ی تایبەت بە دۆسیەكانی تیرۆر، شەوی رابردوو فەرمانێكی دەستگیركردنی دەركردووە بۆ “حسێن فەرەج عەبودی” ناسراو بە “ئەبو عەلی عەسكەری” و رێگەی بە پۆلیس و هێزە ئەمنییەكان داوە، ناوبراو دەستگیربكەن، كە دانیشتوی ناوچەی سەدر-ی بەغدای پایتەختە.
ئەو تۆمەتەی لە نوسراوەكەی دادگادا خراوەتە پاڵ ئەبو عەلی، پەیوەستە بە ماددەی 4ی تیرۆرەوە و سكاڵاكار لە بەڕێوەبەرایەتیی ئاسایشی حەشدی شەعبی سكاڵاكەی لەسەر ناوبراو تۆمەتبار كردووە، بێ ئەوەی ناوی سكاڵاكار ئاشكرا كرابێت.
لە چەند رۆژی رابردوودا، ئەبو عەلی عەسكەری، كە سەركردەیەكی عەسائیب ئەهلی حەقی سەر بە قەیس خەزعەلی-یە، لە پەیامێكدا هەڕەشەی “گوێبڕین”ی لە مستەفا كازمی سەرۆك وەزیرانی عیراق كرد، ئەمەش دوای ئەوەی هێزە ئەمنییەكان چەند ئەندام و سەركردەیەكی عەسائیبیان دەستگیركرد بەتۆمەتی ئەنجامدانی هێرشە موشەكییەكانی سەر ناوچەی سەوز و باڵیۆزخانەی ئەمریكا.
