شاندێكی هەدەپە سەردانی سەڵاحەدین دەمیرتاشی كرد، داوا لە ئەنقەرە دەكەن بڕیارەكەی دادگای مافی مرۆڤی ئەوروپا جێبەجێبكات بۆ ئازادكردنی ناوبراو، دایكی دەمیرتاش-یش وەڵامی ئەردۆغان دەداتەوە و دەڵێت، “كوڕەكەم تیرۆریست نییە”.
پارتی دیموكراتی گەلان -هەدەپە ئاشكرایكرد، شاندێكی پارتەكە لە زیندانی ئەدێرنە سەردانی سەڵاحەدین دەمیرتاش هاوسەرۆكی پێشوتری هەدەپەی كردووە و لەگەڵیدا كۆبونەتەوە، جەختیان لەسەر پێویستیی دیموكراسیەتی توركیا كردوەتەوە، دەمیرتاش داوای لە لایەنەكان كردووە هەڵوێستەكانیان یەكبخەن.
هەدەپە داواش لە حكومەتی توركیا دەكات، بە زووترین كات بڕیاری دادگای مافەكانی مرۆڤی ئەوروپا جێبەجێ بكات و دەمیرتاش ئازاد بكات.
لای خۆیەوە سەعدیە دەمیرتاش دایكی هاوسەرۆكی پێشوتری هەدەپە وەڵامی ئەردۆغان دەداتەوە، كە لە دوا وتاریدا دووبارە دەمیرتاشی بە تیرۆریست وەسفكرد، دەڵێت، “ئامۆژگاریی منداڵەكانم دەكرد، میوەی داری كەس نەڕنن و نەیخۆن چونكە حەرامە، كەچی ئێستا رۆڵەكەمیان بە بارمتە گرتووە و تۆمەتی تیرۆریان خستووەتە پاڵی، بەڵام رۆڵەكانم تیرۆریست نین”، راشیگەیاندووە، ئەگەر كوڕەكەی تیرۆریستە، چۆن لە كونجی زینداندا بووە كاندیدی سەرۆك كۆمار؟ چۆن بووە پەرلەمانتار؟.
دایكی دەمیرتاش دوپاتیكردەوە، كوڕەكەی تەنها بەرگری لە مافەكانی خەڵك دەكرد، بۆیە زیندانیكردنی دەمیرتاش بە زیندانیكردنی ملیۆنان كەس وەسفدەكات.
