بەرهەم ساڵح سەرۆك كۆماری عیراق دان بەوەدا دەنێت، كە ئەو سیستمە فەرمانڕەواییەی لەدوای 2003 هاتەئاراوە، توانای خزمەتكردنی خەڵكی نییە، پێی وایە عیراق پێویستی بە گرێبەستێكی سیاسیی نوێ هەیە، دژی ئەوەشە قوتی هاوڵاتیان و موچەخۆرانی عێراق و هەرێمی كوردستان ببەسترێتەوە بە ململانێی سیاسییەكانەوە.
د. بەرهەم ساڵح سەرۆك كۆماری عێراق ئەمڕۆ پێنجشەممە لە وتارێكدا، كە بەبۆنەی هاتنی ساڵی نوێ لە رۆژنامەی سەباح-ی نیمچەفەرمیی عێراقی بڵاویكردوەتەوە، نایشارێتەوە، كە “ساڵی 2020 ساڵی نائومێدی و قەیران بوو و لەو ماوەیەدا چەندین ئاستەنگی نەخوازراو رویاندا، لەناویاندا بڵاوبونەوەی كۆرۆنا و هەروەها گەردەلولی سیاسی و قەیرانە ئەمنی و ئابورییەكان، كە دۆخی وڵاتیان بەرەو قۆناغێكی مەترسیدار پەلكێشكرد، ئەوەش دەرخەری راستەقینەی بونی گرفت و كێشە بوو لەسیستەمی وڵات و حكومڕانی”.
بۆیە سەرۆك كۆماری عیراق بەڕوونی دان بەوەدا دەنێت، كە “سیستمی حكومڕانی، كە لەدوای ساڵی 2003وە دروستبوە، روبەڕوی بۆشایی گەورە بوەتەوە و ناتوانێت خزمەتی هاوڵاتیان بكات، بۆیە پێویستیمان بە گرێبەستێكی سیاسیی نوێ هەیە بۆ بەڕێوەبردنی دەوڵەت، كە توانای بونیاتنانی دەوڵەتێكی رێزلێگیراو و خاوەن سەروەری گەرەنتی بكات”.
دژی ئەوەشە، كە “هاوڵاتیانی عێراقی باجی ململانێ و گرفتە سیاسییەكان و گەندەڵی بدەن و یاری بە قوتی رۆژانەی ژیانییانەوە بكرێت، بۆیە پێویست دەكات بڕیار و رێكارەكانی چاكسازی رون بن و هاوڵاتیان لەكاریگەرییەكانی هەموو ململانێ سیاسییەكان دوربخرێنەوە، نابێت قوتی هاوڵاتیان و موچەخۆرانی عێراق و هەرێمی كوردستان ببەسترێتەوە بە ململانێ سیاسییەكان و كاریگەرییە ماڵوێرانكارییەكانی گەندەڵی”.
