بەشێك لە گروپە عێراقییەكانی نزیك لە ئێران ناڕەزایەتیان بەرامبەر بە گرێبەستی حكومەت و دوو كۆمپانیای كۆریای باشور نیشاندا بۆ دروستكردن و تەواوكردنی كارەكانی بەندەری فاو.
قەیس خەزعەلی ئەمینداری گشتی عەسائیبی ئەهلی حەق رایگەیاند، گرێبەستی حكومەت و دوو كۆمپانیای كۆریای باشور بۆ دروستكردنی بەندەری فاو تاوانێكی گەورەیە و راشیگەیاندووە، كەسانی گەندەڵ لە پشت واژۆكردنی ئەو گرێبەستەوەن و چییان پێبكرێت دەیكەن تا گرێبەستەكە هەڵبوەشێنرێتەوە.
هاوكات هاوپەیمانی فەتح بە سەرۆكایەتی هادی عامری و فراكسیۆنی سادیقونی سەر بە عەسائیب رایانگەیاندووە، ئەگەر ئەو گرێبەستە هەڵنەوەشێنرێتەوە، وەزیری گواستنەوە بانگهێشتی پەرلەمان دەكەن و متمانەی لێدەسەننەوە.
بەپێی وتەی چاودێرانی سیاسی نیگەرانی گروپەكانی نزیك لە ئێران لەوەیە كە كۆمپانیایەكی چینی نەیتوانیوە گرێبەستەكە وەربگرێت.
حكومەتی عێراق بە بڕی 2 ملیار و 600 ملیۆن دینار گرێبەستی دروستكردنی بەندەری فاوی لەگەڵ دوو كۆمپانیای كۆریای باشور واژۆكردووە و بڕیارە تا 2022 كارەكانی ئەو بەندەرە تەواو بكرێن، كە توانای دەبێت سێ ملیۆن كۆنتینەر لەخۆ بگرێت، بەوەش دەبێتە یەكێك لە گەورەترین بەندەرەكانی جیهان.
ئاژانسی فارسی ئێرانی بڵاویكردۆتەوە، كۆریای باشور سەر بە ئەمریكایە بۆیە گرێبەستەكەی پێدراوە، لە كاتێكدا كۆمپانیایەكی چینی ئامادەبووە بە تێچووی كەمتر پڕۆژەكە جێبەجێ بكات.
