ژمارەی دانیشتوانی وڵاتێكی پێشكەوتوو لە پاشەكشەدایە

ژمارەی دانیشتوانی كۆریای باشور لە پاشەكشەدایە، و لەماوەی یەك ساڵدا زیاتر لە 20 هەزار كەمیكردوە و ئەوەش یەكەمجارە لە مێژودا رودەدات.
رۆژنامەی گاردیانی بەریتانی بڵاویكردوەتەوە: ژمارەی دانیشتوانی كۆریای باشور لە پاشەكشەدایە و رێژەی چونە تەمەن زیادی كردوە ئەوەش سەرەڕای ئەو هاندەرانەی حكومەتی ئەو وڵاتە خستویەتیە بەردەم دانیشتوانەكەی بۆ خستنەوەی نەوە.
رونیشكراوەتەوە: ئەمە واتای ئەوەیە كۆریای باشور كێشەی كەمبونەوەی دەستی كار و سەرچاوەكانی بۆ دروست دەبێت، بەپێی سەرژمێریەكان ژمارەی دانیشتوان كەمبوەتەوە بۆ 51 ملیۆن و 892 هەزار.
رۆژنامەكە باسی لەوەشكردوە: ژمارەی دانیشتوانی ئەو وڵاتە لە ساڵی 2019ەوە 20 هەزار و 838 كەس كەمیكردوە، لەساڵی 2020دا تەنها 275 هەزار و 815 منداڵ لەدایكبون لە بەرامبەردا 307 هەزار و 764 كەس گیانیانلەدەستداوە.