پەرلەمانی كوردستان بە زۆرینەی دەنگ كەمال ئەتروشی وەك وەزیری سامانە سروشتیەكانی حكومەتی هەرێمی كوردستان دیاری كرد.
لە دانیشتنی رۆژی چوارشەممە 6ی كانونی دوەمی 2021 پەرلەمانی كوردستان بۆ دەنگدان لەسەر “كەمال ئەتروشی” كاندیدی پارتی دیموكراتی كوردستان بۆ پۆستی وەزیری سامانە سروشتیەكان كۆبویەوە.
لە دانیشتنەكە دەمەقاڵە لەنێوان پەرلەمانتاراندا دروست بوو و زۆرینەی پەرلەمانتاران دەیانویست قسە بكەن، بەڵام سەرۆكایەتی پەرلەمان كاندیدەكەی خستە دەنگدانەوە و بەزۆرینەی دەنگ تێپەڕێنرا.
بەپێی زانیاریەكان، لە كۆی 111 ئەندامی پەرلەمانی كوردستان ئەتروشی دەنگی 81 پەرلەمانتاری بەدەستهێناوە، تەواوی دەنگەكانی فراكسیۆنی پارتی كە 45 كورسییە و لە كۆی 18 پەرلەمانتاری ئامادەبوو یەكێتی 17 دەنگیان پێداوە و 7 دەنگی فراكسیۆنی كۆڕان لە كۆی 12 ئەندام و 11 دەنگی پێكهاتەكان و یەك دەنگی پەرلەمانتار باپیر كامەلای بەدەستهێناوە.
