ئەحمەدی حاجی رەشید ئەندامی لیژنەی دارایی پەرلەمانی عێراق دەڵێت: بەهیچ شێوەیەك پەرلەمان ناتوانێت نرخی دۆلار بەرامبەر دینار كەم و زیاد بكات.
ئەحمەدی حاجی رەشید لە ئەكاونتی خۆی لەتۆڕی كۆمەڵایەتی فەیسبوك بڵاویكردوەتەوە: لە خوێندنەوەی یەكەم بۆ پرۆژە یاسای بودجە هیچ بڕیارێك نادرێت لەسەر نرخی دۆلار بەرانبەر دینار، ئەوەی لەناو پرۆژەكەدا هاتوە كە بۆ هەر 100 دۆلارێك 145 هەزار دینار و نرخی نەوتیش بە 42 دۆلار دانراوە، بەهیچ شێوەیەك پەرلەمان ناتوانێت دەنگیان لەسەر بدات و كەم زیادیان بكات.
باسی لەوەشكردوە: نرخی دینار بەو شێوەیە نزیكەی 23 ترلیۆن دیناری بۆ حكومەت گەراندوەتەوە بۆیە گۆرانكاریكردن لەبەرژەوەندی حكومەت نابێت، هەر گۆڕانكاریەك بكرێت یاساكە تێكدەدات و كورتهێنان زیاد دەكات و حكومەت پێی پڕناكرێتەوە.
ئەندامەكەی لیژنەی دارایی جەختیلەوەشكردوەتەوە: ئەوەی لەبازار رودەدات هەوڵی هەندێك خەڵكە بۆ دروستكردنی ناسەقامگیری، بانكی ناوەندی تائێستاش بە 145 هەزار دینار بەرانبەر 100 دۆلار دەیفرۆشیت، هەرگۆڕانكارییەك لەنرخدا بازار تێكدەدات، بۆیە ئەستەمە لەكاتی ئێستادا گۆڕانكاری لەنرخدا روبدات.
