راپۆرتی رەوشی ئازادی رۆژنامەنوسی ساڵی 2020 لەهەرێم راگەیەنرا

راپۆرتی رەوشی ئازادی رۆژنامەنوسی ساڵی 2020 لەهەرێمی كوردستان راگەیەنراو بەپێی راپۆرتەكە، لەو ساڵەدا 385 پێشێلكاری دژی رۆژنامەنوسان تۆمار كراون.
بە دروشمی “هێرش بۆ سەر رۆژنامەنوسێك هێرشە بۆسەر هەمو رۆژنامەنوسان” مەراسیمی راگەیاندنی راپۆرتی رەوشی ئازادی رۆژنامەنوسی ساڵی 2020 لەهەرێمی كوردستان لەلایەن سەنتەری میترۆ بۆ داكۆكی لە مافی رۆژنامەنوسان بەڕێوەچو و لە مەراسیمەكەدا دیاری محەمەد بەڕێوەبەری سەنتەرەكە رایگەیاند: ساڵی 2020 سەنتەرەكەیان 385 پێشێلكاری تۆماركردوە.
رونیشیكردەوە: 163 حاڵەتی رێگریكردن لەرۆژنامەنوسان، 74 حاڵەتی دەستبەسەركردن و راگرتن بەبێ بڕیاری دادگا و 48 حاڵەتی هەڕەشە و سوكایەتی، هەر لەو ماوەیەدا 30 حاڵەتی دەستگیركردن و راگرتن بەدەر لەیاسای رۆژنامەنوسی تۆماركراون، هەروەها 8 حاڵەتی هەراسانكردنی كچانی میدیاكار، 8 حاڵەتی پڕكردنەوەی بەڵێننامە، 6 حاڵەتی شكاندنی كەلوپەلی رۆژنامەنوسی، 4 حاڵەتی داخستنی ئۆفیسی كەناڵەكان و 2 حاڵەتی تەشویشی ئەلیكترۆنی تۆماركراون.
بەڕێوەبەری سەنتەری میترۆ هێمای بۆ ئەوەشكرد: لەو ماوەیەدا لەناوچە كێشە لەسەرەكان 71 حاڵەتی رێگری، 30 حاڵەتی راگرتن بەبێ بڕیاری دادگا، 9 حاڵەتی زەوتكردنی كەلوپەلی رۆژنامەنوسی، 7 حاڵەتی هێرش و سوكایەتی، 2 حاڵەتی پڕكردنەوەی بەڵێننامە و یەك حاڵەتی رفاندن تۆماركراون.
لای خۆشیەوە رێواس فایەق سەرۆكی پەرلەمانی كوردستان لە مەراسیمەكەدا وتەیەكی پێشكەشكرد و وتی: هیچ بەهانە و بیانویەك نابێت ببێتە هۆكار بۆ ئەوەی هێرش بكرێتە سەر رۆژنامەنوسان، بەڵام بەداخەوە جۆرێك لە میدیا ئێستا پەیام ئاڕاستە دەكات كەپێی دەوترێت میدیای كڕدراو، لەلایەن حزب و بەرپرسەكانەوە بەناوی میدیای ئازادەوە بەڕێوەدەبرێن، لەدەرەوەی یاسا كار دەكەن و هۆكارن بۆ هێرشكردنە سەر میدیاكان.