خاوەنی كۆمپانیایەكی خانوبەرە دەڵێت: چاكسازیەكانی حكومەتی هەرێم كاریگەری لەسەر نرخی خانوبەرە هەبوە و نرخەكان بەشێوەیەكی گشتی بەرزبونەتەوە، بەڵام نرخی شوقە و زەوی كشتوكاڵی كەمیكردوە.
سەلام فەقێ كەریم خاوەنی كۆمپانیای خانوبەرەی حاجی سەلام لەكۆنفرانسێكی رۆژنامەوانیدا باسی لەوەكردوە: چاكسازییەكانی حكومەتی هەرێم نرخی خانوبەرەی بەرزكردوەتەوە، بەرزی و نزمی نرخەكان بەپێی مانگەكان گۆڕانكاری پێوەدیارە بەتایبەتی و لەسێ مانگی یەكەمی ساڵی 2020، ئەوەش بەهۆی قەیرانی دارایی و كۆرۆنا و كێشەكانی نێوان هەولێر و بەغداد.
باسی لەوەشكرد: نرخی زەوی لە 2020 بەراورد بە 2019 بەڕێژەی لە 2.33% بەرزبۆتەوە، خانو بە رێژەی لە2.87% و كرێی خانووش بەڕێژەی لە .33% بەرزبۆتەوە، لەبەرامبەردا نرخی شوقە بە رێژەی 2.66% و كرێی شوقە بە رێژەی لە 4.13% كەمی كردوە.
لەبارەی زەوی كشتوكاڵیشەوە، خاوەن ئەو كۆمپانیای خانوبەرەیە وتی: زەوی بازرگانی نرخەكەی بەڕێژەی لە 0.84% بەرزبۆتەوە، بەڵام زەوی كشتووكاڵی بە رێژەی نزیكەی لە5٪ نرخەكەی كەمی كردوە، پێشبینی دەكەن ئەگەر بودجەی 2021 پەسەند بكرێت و ڤاكسین دابەش بكرێت و نەخۆشی كۆرۆنا كەم ببێتەوە، بازاری خانوبەرە جوڵەی باشی بۆ دروست بێت، چونكە لە هەرێمی كوردستان ئاسایش و ئارامی هەیە،و نرخی نەوتیش بەرزبۆتەوە، چاكسازیەكانیش بەردەوام بن كە دەبنە هۆی دابەشكردنی موچە ئەوا هەمو ئەمانە هۆكارن بۆ گەشەی سێكتەری خانوبەرە.
