وەزارەتەكانی پلاندانان و دارایی و ئابوری، بەفەرمی دەستیان بەئامادەكاری بۆ داڕشتنی پڕۆژە یاسای بودجەی ئەمساڵ كردووە و وەزیری پلاندانانیش دەڵێت، هەبوونی بودجە كارئاسانی زۆر دەكات بۆ خەرجی و داهاتەكانی حكومەت.
رۆژی دووشه‌ممه لەوەزارەتی پلاندانانی حكومەتی هەرێم، بەسەرپەرشتی دارا ڕەشید، وەزیری پلاندانان، هەردوو وەزارەتی پلاندانان و دارایی و ئابوری كۆبوونەوەیەكیان بۆ ئامادەكردنی پڕۆژە یاسای بودجەی ئەمساڵی هەرێم ئەنجامدا.
دارا ڕەشید، له‌و باره‌وه رایگەیاندووە، لەو كۆبوونەوەیەدا باس لە خشتەی هەماهەنگی لەگەڵ وەزارەتەكان و ئەنجامدانی كۆبونەوە لەهەفتەی داهاتوو لەگەڵیان كرا بەمەبەستی دارشتنی كاری هاوبەش و ئامادەكردنی بودجەی ساڵی 2021.
ئاماژەی بەوەكردووە، كە داوای لێكردوون پەلەبكەن بۆ دانانی میكانیزمەكانی دارشتنی بودجەی بەكاربەر و بودجەی وەبەرهێنان كە هەردوو وەزارەتی پلاندانان و دارایی بەو ئەركە هەڵدەستن، چونكە سەرباری ئەوەی ماوەی چەندین ساڵە هەرێمی كوردستان بەبێ بودجەیە، بەڵام بەهەبوونی بودجە بۆ ساڵی 2021 كارئاسانی زۆر دەكات بۆ خەرجی و داهاتەكانی حكومەت و هەوڵدان بۆ خزمەتكردنی زیاتری هاوڵاتیان.
