بەڕێوەبەرایەتی پۆلیسی سلێمانی ئاشكرایكرد: لە دوو چالاكیدا 5 تۆمەتباریان دەستگیر كردوە كە لەشاخی ئەزمەڕو گۆیژە رێگرییان لەچەند كەسێك كردبو.
بەڕێوەبەرایەتی پۆلیسی پارێزگای سلێمانی لە راگەیەندراوێكدا ئاماژەی بەوەداوە: پاش سكاڵای هاووڵاتییەك كە لەشاخی ئەزمەڕ لەلایەن سێ تۆمەتبارەوە رێگریی لێكراوە و ساڵانەی ئۆتۆمبێل و مۆڵەتی شۆفێری و بڕێك پارەی لێسەندراوە، دەستبەجێ هێزەكانی پۆلیس لێكۆڵینەوەكانیان بۆ دەستگیركردنی تۆمەتبارەكان دەستپێكرد و لەلایەن مەفرەزەكانی بەشی پۆلیسی فریاكەوتنەوە توانرا دەستگیر بكرێن.
رونیشكراوەتەوە: لەكاتی دەستگیركردنیاندا دەستیشگیرا بەسەر چەكێكدا لەجۆری كڵاشینكۆف و ئۆتۆمبێلێك لەجۆری “تویتا- ئەڤەلۆن” كە بەتۆمەتبارەكان بوە، لەئێستادا بەبڕیاری دادوەر و بەپێی ماددەی 452 لەیاسای سزادانی عێراقی راگیراون‌و لێكۆڵینەوە لەگەڵیاندا بەردەوامە.
پۆلیسی سلێمانی ئاماژەی بەوەشداوە: لەلایەكی دیكەوە لەسەر سكاڵای هاوڵاتیەك دوو تۆمەتباری دیكە لەلایەن مەفرەزەكانی بەشی پۆلیسی نەهێشتنی تاوانەوە دەستگیركران كە لەشاخی گۆیژە رێگرییان لەهاووڵاتیەك كردوە و بڕێك پارەیان لێ سەندبو، لەكاتی دەستگیركردنی تۆمەتبارەكاندا دەستگیرا بەسەر ئۆتۆمبێلێكدا لەجۆری “نیسان- سەنی”، لەئێستادا بەبڕیاری دادوەر و بەپێی هەمان مادە راگیراون.
