پەرلەمانتارێكی یەكێتی : پارتی وەك حزب رازی نیە كە نەوتی هەرێم و داهاتەكەی بنێرێت بۆ حكومەتی فیدڕاڵ

ئەندامێكی فراكسیۆنی یەكێتی لە پەرلەمانی عێراق رایگەیاند، لەو بڕوایەدا نیە هیچ حزبێكی سیاسی ئەگەر بەشداری حكومەتیش بێت لەگەڵ ئەوەدا بێت كە ‌بەم شێوەیە خەڵكی هەرێمی كوردستان بچەوسێتەوە و بێ موچە بێت و پێویستی دەكرد حكومەتی هەرێم هەر لەسەرەتای مانگی یەكەوە ئەو بڕە نەوتەی بناردایە كە دیاریی كراوە، بەڵام  “تائێستاش پارتی وەك حزب رازی نیە كە نەوتی هەرێم و داهاتەكەی بنێرێت بۆ حكومەتی فیدڕاڵ”.
رێزان شێخ دلێر، ئەندامی فراكسیۆنی یەكێتی لە پەرلەمانی عێراق بە دەنگی ئەمریكای راگەیاند، لە‌ناو بودجەدا هاتوە، هەمو داهاتەكان بگەڕێنەوە بۆ حكومەتی فیدڕاڵ لەبەرامبەر ئەمەدا بودجەیەكی تایبەتمەند، كە لەبودجەی 2019دا 12.68% دانراوە، بەڵام بەپێی وەزارەتی پلاندانان كەئێستا دەڵێت 13% و چەند پۆینتێكەو ‌دەبێت ئەو بڕی بودجەیە زیادبكرێت بۆ هەرێمی كوردستان.
رێزان شێخ دلێر دەربارەی هۆكاری واژۆنەكردنی ڕێككەوتننامەی هەرێم و بەغدا رونیكردەوە، پێویستی دەكرد حكومەتی هەرێم هەر لەسەرەتای مانگی یەكەوە ئەو بڕە نەوتەی كە دیاریكراوە ڕۆژانە لەڕێگەی سۆمۆوە بناردایە، بۆ ئەوەی لایەنی بەرامبەر هەست بكات كە بەجددی ئەم حكومەتە دەیەوێت رێككەوتن بكات بۆ ئەوەی ئەو بڕەی كە دیاری دەكرێت بدرێتە هەرێمی كوردستان، لەبەرئەوەی خەڵكی هەرێم بێ موچەیە، وداهاتی نەوت بەشی موچەی موچە خۆران و بەشی وەبەرهێنان و هەمو ئەو بەشانەی تر ناكات، پێویست دەكات ئەو بودجەیە بێتە ئێرە هەتاوەكو بتوانرێت هەرێمی كوردستان لەم نەهامەتیە ئابورییە ڕزگاری ببێت.