دارا رەشید وەزیری پلاندانانی هەرێمی كوردستان ئاشكرایكرد: هەفتەی داهاتوو وەفدێكی هەرێم دەچنە بەغدا بۆ پێداگیری لەسەر پشكی كوردستان لە بودجەی 2021 و ئەو رێككەوتنەی لە نێوان هەردولا كراوە.
د. دارا ڕەشید لە كۆنگرەیەكی رۆژنامەوانیدا وتی: سەرجەم وەزارەتەكان راسپێدراون بۆ پێدانی راپۆرت لەبارەی داهات و خەرجییەكانیان، بۆ ئەوەی پرۆژەی بودجەی هەرێم ئامادە بكرێت، چاوەڕی دەكرێت تا كۆتایی مانگی 2ی ئەمساڵ سەرجەم راپۆرتی وەزارەتەكان ئامادەبكرێن و دواتر دێتە ئەنجومەنی وەزیران، دواتر بۆ ئەنجومەنی شورا و لە مانگی چواری ئەمساڵیش بودجەی هەرێم بخرێتە بواری جێبەجێكردنەوە.
وتیشی: هەفتەی داهاتوو دەچینەوە بەغدا بۆ ئەوەی گفتوگۆ لەسەر خەرجی و داهاتەكان بكەین، ئەگەر ئەو رێككەوتنەی نێوان هەردولا بگاتە ئەنجام ئەوا ئێمە سێ داهاتمان دەبێ بۆ ئەوەی بودجەی هەرێمی لەسەر بنیاد بنێین ئەویش پشكی كوردستان لە عێراق و داهاتی نەوتی خۆمان و داهاتی نانەوتی، بۆ ئەو مەبەستەش وەفدێكی حكومەتی هەرێم و وەفدێكی سیاسی باڵاش دەچینە بەغدا.
وەزیری پلاندانانی رونیشیكردەوە: لە ئەنجومەنی وەزیران بڕیار دراوە كار لەسەر زیادكردنی داهاتەكان بكەین و خەرجیەكان كەم بكەینەوە بە شێوەیەك بارگرانی لەسەر خەڵك دروست نەبێت، چاكسازییەكانیش بەردەوام دەبن لە هەموو كەرتەكان ئەوەش لە پێناوی دابینكردنی ژیانێكی شایستە بۆ هاووڵاتیان.
