بەدر زیادی ئەندامی لیژنەی دارایی پەرلەمانی عێراق لەفراكسیۆنی سائیرون دەڵێت: بەرهەم ساڵح واژۆ لەسەر سزای لەسێدارەكانی تیرۆرستان ناكات، ئەوەش بوەتە هۆی زیادكردنی خەرجی لەسەر عێراق.
بەدر زیادی لە لێدوانێكی رۆژنامەوانیدا باسی لەوەكردوە: لەلایەن دادگای عێراقیەوە چەندین سزای لەسێدارەدان بۆ تیرۆرستان دەرچوە، بەڵام سەرۆك كۆمار واژۆیان لەسەر ناكات و ئەو سزادراوانەش لە زیندانەكاندان، ئەوەش خەرجیەكی زۆری لەسەر عێراق زیادكردوە چونكە لە گرتوخانەكاندا پێویستە خزمەت بكرێن و بەرپرسیارێتی مانەوەی سزادراوان لە گرتوخانەكاندا بۆ ماوەیەكی زیاتر لە ئەستۆی سەرۆك كۆمارە.
پێشتریش حەسەن سالم ئەندامی هاوپەیمانی فەتح باسی لەوەكردبوو: پێویستە پەلە بكرێت لە رەزامەندیدان لەسەر سزاكانی لەسێدارەدان، سزادراوان خزمەتێكی باشیان پێشكەش دەكرێت و دەڵێی لە هۆتێلدان و ملیۆنەها دۆلار لەسەر دەوڵەت دەكەوێت.
