شێخ جەعفەر
(جۆو بایدن و ئایندەی کورد) ستراتیژییەت و سیاسەتی ئەمریکا لەناوخۆو جیهان، بەتایبەت لە ڕۆژهەڵاتی ناوەڕاست خۆی لە کۆمەڵێک ئامانجی جۆراوجۆر دەبینێتەوە، کەسەرەکیترین ئامانجیان دابینکردن و بەرنامەڕێژییە بۆ بەرقەراربوونی ئاسایشی ناوخۆیی و ئارامی و سەقامگیری، بە تایبەت پاراستنی یەکپارچەیی خاکی ووڵاتەکەیان.بەدرێژایی مێژووی حومکڕانیە یەک لە دوای یەکەکانی ئەمریکا پلانی ستراتیژییەتی درێژخایەن بۆ بەرێوەبرنی ئیدارەیەکی سەرکەوتوو خاڵی گرنگ و هەڵوەستە لەسەرکردن بووە، لە هەموو گۆرانکارییەکانی کۆشکی سپی کە سەرۆکەکان تیایدا گۆڕاون یەک ستراتیژییەت پەیڕەو کراوە لەچوارچێوەی سیاسەتێکی درێژخایەن لە بەرژەوەندی ووڵاتەکەیان.خۆمان بەهەڵە دادەبەین ئەگەر وابزانین کە سیاسەتی کۆشکی سپی لە پاش 20 ی ئەم مانگەوە گرەنتی هەموو خێر و خۆشییەک دەکات بۆ کورد، لە ڕاستیدا جیاوازییەکان یەکجار زۆرن لە نێوان دید و تێڕوانینەکانی بەڕێزان ترەمپ و بایدن بۆ زۆرێک لە پرسە گرنگەکانی جیهان لە نێوانیشیاندا پرسی کورد، بەڵام هەرچۆنێک بێت گۆڕانکاری سەرۆکێک ناتوانێ ستراتیژییەتی وڵاتێکی وەکو ئەمەریکا سەرلەبەری ئاوەژوو بکاتەوە. گرنگە بۆ ئێمەی کورد کە بە سیاسەتێکی پڕ لە گۆڕانکاری و سەردەمییانە هەڵسوکەوت لەگەڵ جیهان بکەین بە تایبەت ئیدارەی نوێی ئەمریکا، دەکرێ تێبینی زۆرمان هەبووبێ لەسەر ئەدائی ئیدارەی ترەمپ کە لە واقیعدا حزبەکەشی پاڵپشتێکی گەورەی کورد بووە لە مێژوودا، لە هەمان کاتیشدا سەرۆک بایدن بەدۆستی کورد دەناسرێت، کەچی حزبەکەی لەزۆربەی هەلوێستەکانیان لە ئاست چاوەڕوانییەکانی کوردا نەبووە، بەتایبەتیش لە سەردەمی ئیدارەی ئۆبامادا، ئەوەش دەمانگەێنێتە ئەو دەرئەنجامەی کە کورد دەبێت بەشێوەیەکی تر سیاسەت لەگەل ئەمەریکا بکات، وەک ئەوەی کە هەیە نەوەکو ئەوەی کە حەز دەکا ببێ.سیاسەتی کۆشکی سپی هەرچۆنێک بێ و هەرکەسێک بەڕێوەی ببات ناتوانێت پرسی کورد بباتە پێشەوە مەگەر خۆمان لە ناوخۆدا ئامادەییمان تێدا نەبێ، ئەمەش تەنها لەڕێگای تەبایی و یەکڕیزی و یەک گووتاری ناوخۆیی دەکرێ بەرجەستە ببێ، یەک هەڵوێستیمان بەرامبەر پرسە نەتەوەیی و نیشتیمانیەکان زامنی بەرەو پێشچوونمانە بۆ گەیشتن بە ئامانجەکانمان.
