ئەفسەرێك بە یەك ملیار دیناری موچەوە هەڵدێت

ئەفسەرێك لە پارێزگای بەسرە بە یەك ملیار دینار موچەی فەوجی بەرگری پۆلیسی پارێزگاكەوە هەڵدێت و بەپێی زانیاریەكەش ئەگەری هەیە عێراقی جێهێشتبێت.
سەرچاوەكانی هەواڵی عێراق بڵاویانكردوەتەوە: ئەفسەرێكی فەوجی بەرگری بەسرە یاری نێوان هەڵبژاردەكانی عێراق و كوێتی لە پارێزگاكە وەك هەل قۆستوەتەوە و دوای ئەوەی موچەی فەوجەكەی وەرگرتوە دیار نەماوە.
رونیشكراوەتەوە: هەندێك پارەی كەمی داوە بەو ئەندامانەی فەوجەكە كە ئامادەبون و سەرجەم ئەندامەكانی تر بە پاراستنی یاریەكەوە سەرقاڵ بون، دوای ئەوەی گەڕاونەتەوە بۆ وەرگرتنی موچەكانیان ئەفسەرەكە دیار نەماوە.
بەپێی زانیاریەكان: ئەفسەرەكە بڕی یەك ملیار دیناری بردوەو لێكۆڵینەوەكان لەو بارەیەوە دەستی پێكردوە، زانیارییە سەرەتاییەكانیش باس لەوەدەكەن كە هەڵاتوە بۆ دەرەوەی عێراق، لەوانەشە پارەكە هێشتا لە عێراقدا بێت، چونكە ناتوانێت بە و بڕە پارە زۆرەوە گەشت بكات .