بانكێكی دیاری ئەمریكی پێشبینی دەكات تا مانگی 7ی ئەمساڵ نرخی بەرمیلێك نەوت بگاتە 65 دۆلار، ئەوەش بەهۆی زیادبونی خواست لەسەری.
بانكی “گۆڵدمان ساكس”ی ئەمریكی لەبەیاننامەیەكدا بڵاویكردوەتەوە، لە ساڵی 2020دا بڕی 2 ملیۆن و 300 هەزار بەرمیل كورتهێنان هەبووە، ئەوەش بەهۆی زیادبونی خواست لەسەر نەوت و كەمكردنەوەی هەناردە لەلایەن رێكخراوی “ئۆپێك +”.
رونیشكراوەتەوە، پێشبینی دەكرێت لە نیوەی یەكەمی 2021 كورتهێنان 900 هەزار بەرمیلی رۆژانە بێت، ئەوەش بەرزترە لە ئاست پێشبینیەكان كە 500 هەزار بەرمیل بووە، بەهۆی ئەوەشەوە نرخی نەوتی خاو بەرزدەبێتەوە و یەك بەرمیل خاوی برێنت دەگاتە 65 دۆلار تا مانگی 7ی ئەمساڵ.
بانكەكە پێشبینی دەكات بەبڕی 5 ملیۆن و 300 هەزار بەرمیل رۆژانە خواست لەسەر نەوت زیاد بكات، لەكاتێكدا پێشبینیەكانی پێشتر 6 ملیۆن و 800 هەزار بووە.
دوای ئەوەی بەهۆی بڵاوبونەوەی ڤایرۆسی كۆرۆنا و كەرەنتین لە جیهاندا و كەمبونەوەی خواست لەسەر نەوت، نرخەكەی بەرێژەیەكی بەرچاو دابەزی، رێكخراوی ئۆپێك و هاوپەیمانەكانی بڕی هەناردەی نەوتیان كەمكردەوە بۆ ئەوەی نرخەكەی بەرزبێتەوە، لەئێستادا بەهۆی ڤاكسینەكانەوە بەشێوەیەكی لەسەرخۆ خواست لەسەری زیاد دەكات.
