وەزارەتی گواستنەوەی عێراق رایگەیاند، هەمو هەوڵێكی خۆی خستۆتەگەڕ بۆ گەڕان بەدوای ئەو فڕۆكەوانە عێراقییەی لەیۆنان ونبوە.
وەزارەتەكە لەبەیاننامەیەكدا بڵاویكردەوە، بەسەرپەرشتی راستەوخۆی وەزیری گواستنەوەی عێراق و بەچاودێری بەڕێوەبەری گشتی هێڵی ئاسمانی عێراق، بەدواداچون بۆ ونبونی فڕۆكەیەكی عێراقی و فڕۆكەوانەكەی دەكەن، كە لەیۆنان خەریكی مەشقكردن بووە و لەسەر خەرجی هێڵی ئاسمانی نێردراوە بۆ ئەوێ.
وتیشی، هێڵی ئاسمانی عێراق داوای لە ناوەندی قەیرانەكان كردوە ژوورێكی ئۆپراسیۆن و شانەیەكی قەیرانەكان پێكبهێنێت بۆ چاودێریكردنێكی وردی بەردەوام لەسەر روداوەكە و دەستكەوتنی دوا ئەنجامی پڕۆسەی گەڕان و رزگاركردن كە دەسەڵاتدارانی یۆنان گرتویانەتەبەر بۆ دۆزینەوەی چارەنوسی فڕۆكەوانە عێراقیەكە و تیمێكی پسپۆریش ئامادەیە سەبارەت بە چاودێریكردنی وردەكاری روداوەكە بەمنزیكانە بڕوا بۆ یۆنان.
