پۆلیسی پارێزگای سلێمانی ئاشكرایكرد: دوای ئەوەی كچێكی رفاندوە و بێهۆشی كردوە و دواتر لە شوێنێك فڕێی داوە، تۆمەتبارێكیان دەستگیر كردوە.
پۆلیسی سلێمانی لە بڵاوكراوەیەكدا ئاماژەی بەوەداوە: دوای ئەوەی هاووڵاتیەك سكاڵای تۆماركرد كە كچەكەی بەمەبەستی كڕینی پێداویستی لەماڵ چۆتە دەرەوەو نەگەڕاوەتەوە، سەرجەم بنكەكانی سنوری پۆلیسی سلێمانی راسپێردران بەدواداچونی خێرا بكەن.
ئەوەش هاتوە: دوای وەرگرتنی بڕیاری دادوەر، پۆلیس لێكۆڵینەوەكانی دەستپێكردو گومان خرایە سەر تۆمەتبارێك و توانرا هەمان رۆژ و لەلایەن بنكەی پۆلیسی رزگارییەوە تۆمەتبار دەستگیربكرێت كە بە ئۆتۆمبێلێكی جۆری تۆیۆتا كامری كچەكەی هەڵگرتوەو دوای بێهۆشكردنی لە شوێنێك فڕێیداوە.
پۆلیسی سلێمانی هێمای بۆ ئەوەشكردوە: لەئێستادا تۆمەتبار كە لەدایكبوی 1991ە بەبڕیاری دادوەرو بەپێی ماددەی 421 لەیاسای سزادانی عیراقی راگیراوەو دەستیش گیراوە بەسەر ئۆتۆمبێلەكەیدا، هەروەها كچەكە پاش دۆزینەوەی لەلایەن مەفرەزەكانی پۆلیسەوە گەیەنراوەتە نەخۆشخانە.
