حاكم ئەحمەد ئەنوەر سەرۆكی دەستەی دەستپاكی لەهەرێمی كوردستان باس لەوەدەكات: پێداویستیەكانی دژایەتی گەندەڵی نیە و دژایەتیكردن پرۆسەیەكی خاوە، ئەوەش ئاشكرادەكات كە قەبارەی كەیسی گەندەڵی پەروێزخان 15 بۆ 20 ملیار دینار دەبێت
حاكم ئەحمەد ئەنوەر لە گفتوگۆیەكدا لەگەڵ دەنگی ئەمریكا وتویەتی: تائێستا لەكوردستان پێداویستیەكان بۆ دژایەتی گەندەڵی نیە و پرۆسەكە لەلایەن دەستەكەیانەوە خاوە، پرۆسەكە پێویستی بەوە هەیە پەرەی پێبدرێت بەتایبەتی كە ئێستا هەرێم پرۆسەی چاكسازی دەستپێكردوە.
سەبارەت بە كەیسی ساختەكردنی پسوڵەی گومركی لە مەرزی پەروێزخان وتویەتی: ئەو كەیسە تائێستا لێكۆڵینەوەی لەسەر دەكرێت تۆمەتبارەكان 40 بۆ45 كەسن، بەشێوەیەكی بەردەوام دادوەر بانگیان دەكات، ژمارەیەكیان بۆ تەواوكردنی لێكۆڵینەوە دەستگیركراون، ئەو بڕە پارەیەی دیارنەماوە خەمڵاندنی سەرەتایی هەیە كە لەنێوان 15 بۆ 20 ملیار دیناری عێراقی دەبێت بەڵام لەوانەیە زیاتریش بێت.
سەبارەت بە تێوەگلانی ئەندامێكی ئەنجومەنی پارێزگای سلێمانی لەو كەیسە حاكم ئەحمەد پێی وایە: پرۆسەیەكی گەورەی لەو شێویە بە كەسێك و دوو كەس و چەند كەسێك ناكرێت، من نازانم رۆڵی ئەو ئەندامەی ئەنجومەن چۆنە بەڵام لە ئیفاداتی تۆمەتبارەكانی تردا هاتوە كەیەكێكە لەوان.
