جێگری سەرۆكی حكومەتی هەرێمی كوردستان جەخت لەوە دەكاتەوە كە حكومەتی هەرێم ئامادەیە هەموو پابەندبونەكانی خۆی بەرامبەر بەغدا جێبەجی بكات ، بەلام لەبەرامبەردا پێویستە شایستە دارییەكانی بەدەستبهێنێت.
قوباد تاڵەبانی لە چاوپێكەوتنیكدا لەگەل ناوەندی هەواڵی نیشتمانی عیراقی ڕایگەیاندوە، حكومەتی هەرێم ئامادەیە 250 هەزار بەرمیل نەوتی رۆژانە وداهاتی نانەوتی لەدەروازەكانی هەرێمی كوردستانەوە ڕادەستی بەغداد بكات، بەلام بەپێی یاسا ولەچوارچێوەی دەستور .
هەر لەچاوپێكەوتنەكەیدا سەبارەت بە داواكارییەكانی بەغداش بۆ پێكەوەبەستنی نەوتی بەغدا و نەوتی هەرێمی كوردستان پێكەوە كە لەژێر دەسەڵاتی حكومەتی عێراقیدا بێت، قوباد تاڵەبانی دەڵێت “ئەو داواكارییە نادەستوورییە”.
سەبارەت بە كێشەی ژمارەی فەرمانبەرانی هەرێمی كوردستان، جێگری سەرۆكی حكومەتی هەرێمی كوردستان ئاماژەی بەوە كردووە، وەزارەتی دارایی عێراق تۆماری 683 هەزار فەرمانبەری هەرێمی كوردستانی لایە، لەكاتێكدا حكومەتی هەرێمی كوردستان 751 هەزار فەرمانبەری هەیە، هەرێمی كوردستانیش بەبێ بوونی داهاتێكی تایبەت بە خۆی ناتوانێت مووچەی ئەو فەرمانبەرانە بدات كە جیاوازییەكەی لەگەڵ تۆماری وەزارەتی دارایی عێراق نزیكەی 70 هەزار فەرمانبەرە.
جێگری سەرۆكی حكومەتی هەرێم ئەوەشی ئاشكرا كردوە كە هەرێمی كوردستان لە ساڵی 2014 تاوەكو 2018 سەرباری پەیمانی رێككەوتنەكان، هیچ پشكێكی لە حكومەتی فیدراڵی وەرنەگرتووە، ودەلێت خۆش حاڵ ئەبووین ئەگەر ئەو پارەیە بدرایەتە پارێزگاكانی تری عێراق كە پێویستیانە، بەڵام پارەكە دیار نیە وكەس نازانێت بۆكوێ چووە.
