سه‌رۆك وه‌زیرانی عێراق رایگه‌یاند، پێویسته سامانی وڵاته‌كه به‌شێوه‌یه‌كی دادپه‌روه‌رانه به‌ر ناوچه‌كانی عێراقدا دابه‌شبكرێت، راشیگه‌یاند، پێویستە وەبەرهێنانی باش لەبەرزبونەوەی نرخی نەوتدا بکرێت.
مستەفا کازمی سەرۆک وەزیرانی عێراق لەمیانی کۆبونەوەی لەگەڵ لیژنەی دارایی پەرلەمان بۆ تاوتوێکردنی پرۆژە بودجەی 2021 و هەماهەنگی نێوان حکومەت و پەرلەمان لەوبارەیەوە، رایگەیاند، پێویستە سامانی عێراق دادپەروەرانە بەسەر ناوچەکانی عێراقدا دابەش بکرێت و نابێت ناکۆکی سیاسی کاریگەری لەسەر ماف و خزمەتگوزاری هاوڵاتیان هه‌بێت.
سەرۆک وەزیرانی عێراق جەختیشیکردەوە کە پرۆژە بودجەی 2021 چارەسەری زۆربەی ئەو کێشە ئابورییانە دەکات کە چەندین ساڵە عێراق پێوەی دەناڵێنێت.
وتیشی، ئامانجی سەرەکی لەدارشتنی ئەو پرۆژەیە کە ئێستا لەبەردەستی پەرلەماندایە، ئەنجامدانی چاکسازی ئابوری و داراییە و پێویستە وەبەرهێنانی باش لەبەرزبونەوەی نرخی نەوتدا بکرێت کە لەماوەی دو رۆژی رابردودا رویداوە و پێدەچێت لەئایندەدا بەرزبونەوەی زیاتر بەخۆوە ببینێت.
سەرۆک وەزیرانی عێراق، جەختیشی لەوە کردوە کە دەبێت هەنگاوەکانی ئایندەی حکومەت و پەرلەمان بەئاراستەی روبەڕوبونەوەی ئەو ئاڵنگارییانە بێت کە ئێستا روبەڕوی عێراق بوەتەوە و لەئاستی داواکارییەکانی وەرەقەی سپی بۆ چاکسازی ئابوریدا بێت.
