وەزارەتی دارایی و ئابووریی حكوومەتی هەرێمی كوردستان، لەبارەی ئەو كەسانەی دوو مووچەیان هەبووه و مووچەكانیان ڕاگیراوە، بڕیارێكی دهركرد.
بەپێی نووسراوێكی وەزارەتی دارایی، “پاش ئەوەی بڕیار درا بە ڕاگرتنی مووچەی 10 هەزار 609 مووچەخۆر كە لە سیستەمی بایۆمەتری دوو جار، یان زیاتر تۆمار كراون، بۆ جێبەجێكردنی ئەو فەرمانە بڕیارێكمان دەركردووە”.
بەپێی بڕیارەكە پێداچوونەوە بە دۆسیەی ئەو مووچەخۆران دەكرێت و پێویستە وەزارەت و فەرمانگەكان چەند ڕێكارێك ئەنجام بدەن.
سەبارەت بە ڕێكارەكان باس لهوه كراوه: “لێژنەیەكی پسپۆڕ لە گشت وەزارەتەكان بۆ ئەو بابەتە دروست بكرێت، لێژنەكە دەبێت سێ فۆڕم كە تایبەتن بەو بابەتە، لە وەزارەت و فەرمانگەكانیان پڕ بكەنەوە”.
ئەو سێ فۆڕمە بۆ بەشی بایۆمەتری دەنێردرێت، كە لەنێو بەڕێوەبەرایەتیی گشتیی بودجەی وەزارەتی داراییە.
لەو فۆڕمانە یەكێكیان تایبەتە بەوانەی دوو مووچەی فەرمانبەرییان هەیە، یەكێكی دیكه تایبەتە بە مووچەیەكی فەرمانبەری و یەكی خانەنشینی، ئەوەی دیكهش بۆ ئەوانەیە كە دوو مووچەی خانەنشینییان هەیە.
لە زانیارییەكاندا داوای كۆدی بایۆمەتریی ناو و ناونیشان و مووچە و فەرمانگەكەی كراوە.
