wazho.net
كارمەندە فیدراڵیەكانی بەنداوەكانی هەرێم و بەڕێوەبەرایەتی رەگەزنامەی سلێمانی بەهۆی دواكەوتنی موچەكانیانەوە دەستیانكرد بە مانگرتن.
سەرلەبەیانی ئەمڕۆ سێشەممە كارمەندە فیدراڵیەكانی بەنداوەكانی هەرێم هەروەها كارمەندانی رەگەزنامەی سلێمانی دەستیانكردوە بە مانگرتن، ئەوەش بەهۆی دواكەوتنی موچەكانیان و دابەشنەكردنی.
لای خۆیەوە سەلام نەجم لێپرسراوی بەشی هایدرۆلۆجی لە بەنداوی دوكان لە كۆنگرەیەكی رۆژنامەوانیدا وتی: ماوەی 5 مانگە بەهۆكاری سیاسی حكومەتی فیدراڵ موچەكانمانی راگرتوەو دوای چەندین هەوڵ تائێستا موچەمان وەرنەگرتوە، بۆیە بایكۆتی دەوام دەكەن بەتایبەت لەئێستادا كە كاتی گلدانەوەی ئاوە.
لەلایەكی ترەوە، كارمەندانی رەگەزنامەی سلێمانی بایكۆتی دەوامیان كردوە و جەختلەوەدەكەنەوە، موچەی 3 مانگی پێشویان وەرنەگرتوە، لەكاتێكدا ئەوان سەربە حكومەتی ناوەندین و مانگانە موچەكانیان بۆ خەرج دەكرێت، بەڵام لەلایەن حكومەتی هەرێمەوە دابەشناكرێت و بە لێبرینەوە دوای سێ مانگ موچەیان پێدەدرێت.
