ئەنجومەنی پیرانی ئەمریكا داوا لە ئیدارەی جۆ بایدن سەرۆكی ئەو وڵاتە دەكات، پەستان بخاتە سەر توركیا بۆ ئەوەی هەوڵی زیاتر بدات بۆ پاراستنی مافەكانی مرۆڤ.
سەرچاوەكانی هەواڵی ئەمریكا بڵاویانكردوەتەوە، 54 ئەندامی ئەنجومەنی پیران نامەیەكیان واژۆكردوە كە تێیدا رەجەب تەیب ئەردۆغان بە سەركوتكردنی ئۆپۆزسیۆنەكان و بێدەنگ كردنی راگەیاندن و رەخنەگران و رۆژنامەنوسان و سیاسیەكان و زیندانیكردنیان و پاكتاوكردنی دادوەران تۆمەتبار دەكات.
لە نامەكەدا ئەوەش هاتوە، پێویستە ئەردۆغان ناچار بكەن بەخێرایی كۆتایی بە هەڵمەتە سەركوتكاریەكەی بهێنێت لەناوخۆ و دەرەوە، هەروەها زیندانیە سیاسیەكان و ئەوانەی لەسەر ڕاو و بۆچون دەستگیر كراون ئازاد بكرێن.
دوای ئەوەی جۆ بایدن پۆستی سەرۆكی ئەمریكای گرتەدەست، پێشبینی دەكرێت توندتر بێت لە مەلەفەكانی تایبەت بە مافەكانی مرۆڤ و پەستان خستنە سەر توركیا لەو بارەیەوە.
