كاوە عبدولقادر ئەندامی پەرلەمانی كوردستان لە فراكسیۆنی نەوەی نوێ دەڵێت: گرانبونی بەنزین لە هەولێر پەیوەندی بەقۆرغكاری كۆمپانیاكانی بەرپرسانی پارتیەوە هەیە و رێگە نادەن بەنزینی ئێرانی بچێتە هەولێرەوە.
كاوە عبدولقادر لە ئەكاونتی خۆی لەتۆڕی كۆمەڵایەتی فەیسبوك بڵاویكردوەتەوە: ماوەی پێنج رۆژە رێگا نادرێت بەنزینی ئێرانی لە رێگای دەروازەكانەوە بگاتە سنوری پارێزگای هەولێر كە پێشتر رۆژانە دوو ملیۆن لیتر بەنزین لەئێرانەوە دەگەیشتە هەولێر و نرخی یەك تۆن بەنزین بە 410 دۆلار دەدرا بە بەنزینخانەكان.
رونیشیكردوەتەوە: بەڵام ئێستا حكومەت رێگا نادات ئەو بەنزینە لە ئێرانەوە بێت و بەنزینخانەكان بە ناچاری پێویستە لە “كۆمپانیای كار”ی بكڕن تۆنی بە 510 دۆلار، واتە 100 دۆلار گرانتر لەبەنزینی ئێرانی كەهەمان كوالیتی هەیە.
ئەو پەرلەمانتارە جەختیلەوەشكردوەتەوە: ئەمەش وایكردوە لەماوەی دوو رۆژدا لە هەولێر نرخی یەك لیتر بەنزین زیاتر لە سەد دیناری بچێتەسەرو باجی گرانبونەكەش خەڵكی ئاسای سنوری پارێزگای هەولێر دەیدات.
