سەرۆكایەتی شارەوانی هەولێر ئاشكرایكرد: زەوییەكانی ناوچەی كەڕك كە 7 هەزار كارتن بڕیاری تاپۆكردنیان بۆ دەرچوە.
ئەندازیار عەبدولواحید ئەحمەد سەرۆكی شارەوانی هەولێر لە كۆنگرەیەكی رۆژنامەوانیدا وتی: لە ماوەی رابردودا 126 هەزار پارچە زەوی بە كارت دابەشكراوە، بەڵام لەسەر رێنماییەكانی سەرۆكی حكومەت دەستمان بە كاركردنی زیاتر و چالاكتر كردوە، بۆیە توانیومانە تا ئێستا 76 هەزار پارچە زەوی بكەین بە كارت.
وتیشی: لەو پارچە زەوییانەی بڕیاری تاپۆكردنیان دەرچوە كە 7 هەزار و 163 پارچەن لە كەرتی پیرزین، هاوڵاتیان دەتوانن سەردانی تاپۆیەكانی یەك و دوو و عەنكاوە و دەشتی هەولێر بكەن بۆ چۆنییەتی راییكردنی كارەكانیان، لە ئێستادا پێنج هەزار كارتی دیكە لە قۆناغی تەواو بوندان كە ئەوانیش زەوییەكانی قەرەبوی گوندی كۆری و گەڕەكی پێشمەرگە و چەند پڕۆژەیەكی دیكەش دەگرێتەوە.
لەبارەی تاپۆكردنی خانوە زێدەڕۆییەكان لەسنوری شارەوانی هەولێر سەرۆكی شارەوانی وتی: گرفتی یاسایی هەبوە بۆیە تێبینییەكان دراوەتە پەرلەمان تا هەمواری بكاتەوە و دیسانەوە دەگەڕێتەوە بۆ ئێمە و كاری لەسەر دەكەین، بەڵام هاوڵاتیانی خاوەن خانوی زێدەڕۆیی ئاگاداركراونەتەوە تا خۆیان تۆماربكەن بۆ ئەوەی بۆ قۆناغی دەستپێكردنەوەی ئەو پڕۆسەیە سودی هەبێت.
