جێگری سەرۆكی وەزیرانی هەرێمی كوردستان رایدەگەیەنێت، شاندی هەرێم تا دەگاتە رێككەوتن لەسەر پرسی بودجە، گفتوگۆكانی بەردەوام دەبێت.
قوباد تاڵەبانی جێگری سەرۆكی وەزیرانی هەرێمی كوردستان و سەرۆكی شاندی دانوستانكاری هەرێم بۆ بەغدا بە میدیای فەرمی یەكێتی رایگەیاندوە، كۆبوونەوەكانیان لە بەغدا بەردەوام دەبن تا دەگەنە رێككەوتن لەبارەی شایستە داراییەكانی ھەرێمی كوردستان.
باسی لەوەشكردووە، بەهەموو لایەنەكانیان راگەیاندووە كە پابەند دەبن بە یاسا و دەستور و ئەوەی ئەركی حكومەتی ھەرێمە جێبەجێی دەكەن و بەرامبەر ئەم پابەندییە دەبێت تەواوی شایستە داراییەكانی هەرێمی كوردستان و مافەكانی مووچەخۆران دابین بكرێت”.
ئەوە لەكاتێكدایە رۆژی پێنجشەممە شاندی هەرێم لەگەڵ مستەفا كازمی، سەرۆك وەزیران و محەمەد حەلبوسی، سەرۆكی پەرلەمانی عێراق كۆبونەوە.
